Հիվանդանոց տեղափոխված 23-ամյա ուղևորուհին մահացել է. ՏԵՍԱՆՅՈՒԹ
SHAMSHYAN.com-ի տեղեկություններով՝ երեկ՝ օգոստոսի 4-ին, հիվանդանոցում մահացել է Վանաձոր քաղաքի բնակիչ՝ 23-ամյա Հասմիկ Խաչատրյանը։ Ինչպես հայտնում է ֆոտոլրագրող Գագիկ Շամշյանը, վերջինս հիվանդանոց էր տեղափոխվել հուլիսի 30-ին Վանաձոր քաղաքի Թումանյան փողոցի 3 հասցեի դիմաց տեղի ունեցած ավտովթարի հետևանքով։
Նյութերի նախապատրաստման ընթացքում Ճանապարհային ոստիկանության 2-րդ սպայական գումարտակի 5-րդ վաշտի ավագ հետաքննիչ Ռոման Պետրոսյանի կողմից պարզվել է, որ Mercedes-ը վարել է Վանաձոր քաղաքի բնակիչ՝ 38-ամյա Արտյոմ Յոլչյանը, BMW-ն վարել է Վանաձոր քաղաքի բնակիչ՝ 26-ամյա Էդմոն Պետրոսյանը։ Վթարի հետևանքով «Վանաձոր» ԲԿ են տեղափոխվել Հ. Խաչատրյանը, Վանաձորի բնակիչներ՝ 28-ամյա Լևոն Ղամբարյանը, 18-ամյա Էմմա Չատինյանը և 20-ամյա Աննա Խաչատրյանը։ Ինչպես ավելի վաղ հայտնել էր ֆոտոլրագրողը, հուլիսի 30-ին խոշոր ավտովթար էր տեղի ունեցել Լոռու մարզում: Ժամը 22:50-ի սահմաններում Վանաձոր քաղաքի Թումանյան փողոցի վրա 6 հասցեի մոտ բախվել էին Mercedes մակնիշի և BMW մակնիշի ավտոմեքենաները: Վթարի հետեւանքով BMW-ի ուղեւորը քաղաքացիների եւ փրկարարների օգնությամբ դուրս էր բերվել ավտոմեքենայից եւ տեղափոխվել Վանաձորի բժշկական կենտրոն:
Օպերատիվորեն դեպքի վայր էին ժամանել Արտակարգ իրավիճակների նախարարության փրկարար ծառայության Լոռու մարզային փրկարարական վարչության Վանաձորի հրշեջ-փրկարարական ջոկատը՝ 1 մարտական հաշվարկով: Օպերատիվորեն դեպքի վայր էին ժամանել ճանապարհային ոստիկանության 2-րդ սպայական գումարտակի 5-րդ վաշտի 1-ին դասակի ծառայողները՝ վաշտի հրամանատար Լյուդվիգ Ղանդիլյանի և դասակի հրամանատար Կոստան Բուդաղյանի գլխավորությամբ: