Եթե պարետատան կանոնների կիրառման թյուրըմբռնում է եղել, պետք է պատասխանատվություն կրի նաև թյուրըմբռնման հեղինակը՝ ՀՌԱՀ-ը. Նարինե Մկրտչյան
Իշխանությունների՝ մամուլի հանդեպ վերաբերմունքն ավելի ու ավելի է կարծրանում, և այս հանգամանքը մամուլն ավելի է բևեռացնում. այս մասին Tert.am-ի հետ զրույցում ասաց Մամուլի ազգային ակումբի նախագահ Նարինե Մկրտչյանը՝ անդրադառնալով ոստիկանության ընտրած գործեալոճին լրատվամիջոցների նկատմամբ:
Հիշեցնենք, որ օրերս ՀՀ ոստիկանության ծառայողներն այցելել են «ԱրմՆյուզ» հեռուստաընկերություն՝ վարչական վարույթ հարուցելու նպատակով:
«Մամուլի դեմ չի կարելի պատերազմել. դա դեմ է ոչ միայն ժողովրդավարությանը, այլև այդ բացասական վերաբերմուքն աշխատում է հենց իշխանությունների դեմ: Իշխանությունների քննադատությունը ԶԼՄ-ների և՛ իրավունքն է, և՛ մասնագիտական գործունեության կարևոր սկզբունքներից մեկը: Իշխանությունը դրա հետ պետք է հաշտվի: ԶԼՄ-ները կարող են դառնալ տեղեկատվական պատերազմի գործիք. դա էլ տեխնոլոգիապես անխուսափելի է: Ընդդիմադիր տրամադրված ԶԼՄ-ների դեմ ոչ թե պետք է պայքարել, այլ մերձիշխանական լրատվամիջոցներին այնքան ազատություն տալ, որ նրանք դառնան ավելի պրոֆեսիոնալ և մրցակցության մեջ առնվազն չպարտվեն»,-ասաց Նարինե Մկրտչյանը:
Ինչ վերաբերում է լրագրողների՝ դիմակ չկրելուն, ապա Մամուլի ազգային ակումբի նախագահը նշեց.«Անկեղծ պետք է ասեմ, որ այս հարցում ես նրանց դաշնակիցը լինել չեմ կարող: Ես պայքարում եմ դիմակ դնելու համար, և դիմակ չկրելը չեմ կարող պաշտպանել, եթե անգամ դիմակ չկրողներն իմ գործընկերներն են: Օրինակ՝ ես ուղիղ եթերում դիտողություն արեցի ինձնից հարցազրույց վերցնող շատ սիրելի գործընկերոջս: Կորոնավիրուսի դեմ պայքարելու այլ միջոց դեռ չկա, և դիմակ դնելն ու տարածություն պահպանելը պայքարի հիմնական միջոցներն են:
Հանրային առողջությունն անչափ կարևոր է, իսկ համաճարակը՝ անչափ վտանգավոր մեր ցանկություններով իրավիճակին մոտենալու համար: Ես համոզված եմ, որ բոլորը պետք է հավասար լինեն օրենքի առաջ և պարտադիր դիմակ կրեն: Այլ խնդիր է, որ գուցե ստուգումներն ընտրովի են կատարվել, գուցեև՝ նշանառվել: Եթե թյուրըմբռնում է տեղի ունեցել պարետատան կանոնների կիրառման առումով, պետք է պատասխանատվություն կրի նաև թյուրըմբռման հեղինակը, տվյալ դեպքում՝ ՀՌԱՀ-ը»:
Հետևեք մեզ Viber-ում
