Մենք միշտ եղել ենք ու կլինենք Ալվինայի և Ֆելիքսի կողքին․ Գագիկ Համբարձումյան
Հրապարակը գրում է.
Ոստիկանապետի նախկին տեղակալ, ոստիկանության գեներալ-մայոր Գագիկ Համբարձումյանին խնդրեցինք կարծիք և դիրքորոշում հայտնել Սահմանադրական դատարանի դատավորների և ՍԴ-ի շուրջ ծավալված իրադարձությունների վերաբերյալ՝ նկատի ունենալով նաև, որ Ալվինա Գյուլումյանը, Ֆելիքս Թոխյանն ու Գագիկ Համբարձումյանը ընկերներ ու մտերիմներ են։ Հիշեցնենք նաև, որ ԱԺ-ն ընդունեց մի օրենք, որով դադարեցվեցին Ալվինա Գյուլումյանի, Ֆելիքս Թոխյանի և Հրանտ Նազարյանի պաշտոնավարման ժամկետները։
«Ազգային ժողովի կողմից ընդունված փոփոխությունների հակասահմանադրականության վերաբերյալ արդեն շատ- շատերը կարծիք են հայտնել, ես այդ թեմայով չեմ ուզում կրկնել պարզապես։ Ես կուզեի խոսք ասել կոնկրետ 2 անձանց վերաբեյալ՝ խոսքս Ալվինա Գյուլումյանի և ֆելիքս Թոխյանի մասին է, որոնց ճանաչում եմ 45 տարուց ավել՝ ուսանողական տարիներից։ Ալվինա Գյուլումյանի հետ մենք համակուրսեցիներ ենք եղել, և այդ երկար ժամանակաշրջանի շփումն ու հարաբերությունները ինձ թույլ են տալիս գնահատական տալ, որ և՛ Ալվինան, և՛ Ֆելիքսը շատ բարձր կարգի իրավաբաններ են, պրոֆեսիոնալ, արհեստավարժ դատավորներ և շատ ազնիվ ու պարկեշտ անձնավորություններ։ Նրանք Հայաստան պետության անկախացումից ի վեր՝ մինչև օրս շատ մեծ ու լուրջ ներդրում են ունեցել մեր պետականաշինության գործում, որը ես չեմ կարող ասել այսօրվա մեր ԱԺ-ի և կառավարության բացարձակ մեծամասնության հասցեին։ Նրանք իրենց ողջ գիտակցական կյանքում որպես լավ իրավաբաններ, լավ մասնագետներ զբաղվել են արդարադատությամբ, ու ճակատագրի հեգնանքով իրենց աշխատանքային գործունեության մայրամուտին, դառնում են անարդարության զոհ։ Ես ցանկանում եմ ասել նաև, որ մենք՝ Ալվինայի և Ֆելիքսի հետ ընկերներ ենք, և բոլոր իրենց ճանաչողները․․․ եղել ենք ու միշտ կլինենք իրենց կողքին։ Ցանկանում եմ իրենց, որ չընկճվեն, հոգու արիություն եմ ցանկանում և թող Աստված պահապան լինի մեր պետությանը»,- ասաց Համբարձումյանը։