Հայկ Մարությանը կորոնավիրուսային ճգնաժամի օրերին 10 մլն դրամ է հատկացրել նոր ծառայողական մեքենա գնելու համար․ Դավիթ Խաժակյան

Երևանի ավագանու «Լույս» խմբակցության ղեկավար Դավիթ Խաժակյանը ֆեյսբուքյան իր էջում տեղեկացրել է, որ քաղաքապետ Հայկ Մարությանը կորոնավիրուսի ճգնաժամի օրերին 10 մլն դրամ է հատկացրել ծառայողական մեքենա ձեռք բերելու համար։

Գրառումն ամբողջությամբ ներկայացնում ենք ստորև․

«Հիշում եք, որ Նիկոլ Փաշինյանը Երևանի քաղաքապետի թեկնածուի կարգավիճակում ասում էր, որ 70%-ով ծառայողական մեքենաները պետք է կրճատվեն։

Հիմա, երբ իր նշանակած քաղաքապետն է պաշտոնավարում, իրականացվում է ճիշտ հակառակը։ Եթե ընդունենք, որ 70%-ի կրճատումը չափազանցություն էր, այդուհանդերձ փաստենք, որ Մարությանը ոչ միայն չկրճատեց մեքենաները, այլև ինչ մնացել էր պարկում և չէր շահագործվում՝ ծախս չառաջացնելով, նա ամրակցեց պաշտոնյաներին։

Ուղիղ 5 օր առաջ Մարությանը մի շարք ծախսային հոդվածներից նվազեցում իրականացրեց և շուրջ 10 միլիոն դրամ հատկացրեց ՆՈՐ ԾԱՌԱՅՈՂԱԿԱՆ ՄԵՔԵՆԱ գնելուն։ Փաստորեն կորոնավիրուսային ճգնաժամը բոլորի որոշումների վրա պետք է ազդի, բացի Մարությանից։ Մեքենաների վերաբաշխման և ինչո՞ւ ոչ՝ կրճատման փոխարեն Մարությանը որոշեց հավելյալ գումար հատկացնել նոր մեքենա գնելու համար։

Իդեպ այս ամենն իրականացվում է քաղաքի եկամուտների էական անկման ֆոնին»։