Հրապարակվել են տեղեկություններ, որոնք, մեղմ ասած, կասկածելի են դարձնում Փաշինյանի իշխանության լեգիտիմությունը. Դավիթ Ջամալյան
«Ես ապաքինում եմ մաղթում մեր բոլոր հայրենակիցներին, ովքեր վարակվել են, բայց տվյալ դեպքում վարակված լինելը չի կարող պատճառ լինել հանրությանը հուզող հարցերից խուսափելու համար։ Հրապարակվել են տեղեկություններ, որոնք, մեղմ ասած, կասկածելի են դարձնում Փաշինյանի իշխանության լեգիտիմությունը, ընդ որում այդ տեղեկությունները ներկայացվել են փաստարկված, կոնկրետ անձանց անուններ են հնչել, հղում է արվել կոնկրետ փաստաթղթերի»,-«Փաստինֆո»-ի հետ զրույցում այս մասին ասել է ռազմական փորձագետ Դավիթ Ջամալյանը՝ անդրադառնալով Սուրբ Աթոռում ՀՀ նախկին դեսպան Միքայել Մինասյանի վերջին տեսաուղերձում հնչած հայտարարությանը, որտեղ Միքայել Մինասյանը ՀՀ վարչապետ ՆԻկոլ Փաշինյանին մեղադրեց Հայաստանը զենքի անօրինական վաճառքում ներգրավելու մեջ:
«Ըստ ամենայնի խոսքը ծանրագույն պետական հանցագործության մասին է, և եթե հնչեցված տեղեկությունները իրականությանը չեն համապատասխանում, ապա ադեկվատ իշխանությունն անմիջապես պետք է հանդես գար հերքումով»,-մեզ հետ զրույցում շեշտեց Դավիթ Ջամալյանը՝ ընդգծելով, որ այդ հերքումը չկա:
«Լռություն է, շատ խոսուն լռություն։ Իսկ եթե չկա հերքում, ուրեմն չկա ասելիք։ Իսկ հետևությունը մեկն է՝ այս իշխանությունը ձախողված է, բարոյապես տապալված, և չունի հեռանկար»,-ասաց ռազմական փորձագետը:
Հիշեցնենք, Միքայել Մինասյանը տեսանյութում անուններ էր հնչեցրել եւ փաստաթուղթ հրապարակել՝ նշելով, որ մաքսանենգ ծխախոտի, ինչպես նաև զենքի սկանդալը ծածկադմփոց անելու համար Փաշինյանը ՌԴ է գործուղել գեներալ Արշակ Կարապետյանին: Միքայել Մինասյանն ասել էր, որ ՀՀ վարչապետը ոմն Դավիթ Գալստյանի միջոցով ՌԴ-ից ՀՀ-ի համար գնված զենքն ավելի բարձր գնով վերավաճառել է 3-րդ, ապա 4-րդ երկրի:
Հավելենք, որ նախկին դեսպանի մեղադրանքները հերքել էր վարչապետի աներորդին՝ պատգամավոր Հրաչյա Հակոբյանը՝ իր հերթին մեղադրանքներ հնչեցնելով նախկին իշխանությունների հասցեին, բայց Միքայել Մինասյանի տեսանյութում հնչած անուններին ու փաստերին ուղղակիորեն չէր անդրադարձել:
«Երբ իշխանությունը լռության է մատնում թեման, չհերքելով Մինասյանի կողմից հնչեցրած տեղեկությունները, փորձում է լրատվական տարածությունը հագեցնել ուշադրությունը շեղող այլ թեմաներով, ապա մատնում է իրեն։ Ինչևէ, փաստ է, որ այս պահի դրությամբ գործ ունենք չհերքված տեղեկությունների հետ։ Եվ ուրեմն փաստ է նաև՝ երկրի հեղինակությանը հասցված հարվածն, ու այս իշխանության բարոյական դեգրադացիան»,- «Փաստինֆո»-ի հետ զրույցում եզրափակեց Դավիթ Ջամալյանը։
Հետևեք մեզ Viber-ում
