Քաջարանցիների գործով Խորեն Միրզոյանը ևս կալանավորվեց
Քաջարանցիների աղմկահարույց գործով Խորեն Միրզոյանը կալանավորվեց։ Երևանի ընդհանուր իրավասության դատարանը՝ դատավոր Ռոբերտ Պապոյանի նախագահությամբ, բավարարել է նրա նկատմամբ կալանավորումը որպես խափանման միջոց ընտրելու մասին քննիչի միջնորդությունը։ Այս մասին «Փաստինֆո»-ն տեղեկացավ պաշտպան Հովսեփ Սարգսյանից։
Նշենք, որ Խորեն Միրզոյանին մեղադրանք է առաջադրվել ՀՀ քրեական օրենսգրքի 131-րդ հոդվածի 2-րդ մասի 1-ին կետով՝ մի խումբ անձանց կողմից նախնական համաձայնությամբ անձին առևանգելու համար։ Նա իրեն առաջադրված մեղադրանքը չի ընդունում։
Հիշեցնենք՝ մայիսի 24-ին Երեւանից հատուկ ջոկատայիններ են գործուղվել Սյունիք հատուկ գործողություններ իրականացնելու նպատակով: Վաղ առավոտյան սպեցնազն անցել է գործի եւ 4 անձ բերման է ենթարկվել։ Հետագայում՝ մեկ հոգին ազատ է արձակվել. Հայտարարվեց, թե նրան սխալմամբ էին բերման ենթարկել ու հենց նրա նկատմամբ էլ ոստիկանության բաժնում բռնություն է գործադրվել։ Համենայն դեպս՝ մամուլում տարածվել էր բռնության հետքերով լուսանկարները։ Ոստիկանության բաժնի մոտ հավաքվել էին մեծ թվով քաջարանցիներ՝ պահանջելով ազատություն ու արդարություն։ Նրանք բողոքի ակցիան դադարեցրին միայն այն բանից հետո, երբ Քաջարանի համայնքի ղեկավարը հայտարարեց, որ իրեն հավաստիացրել են, որ ոստիկանության բաժնում կիրառված բռնության դեպքի առթիվ պատշաճ քննություն կընթանա։
Ձերբակալվածները տեղափոխվել էին Երեւան, եւս այստեղ փաստաբանները բողոք էին ներկայացրել նրանց ձերբակալելու որոշումների դեմ։ Դատարանը բոլոր երեք դեպքում էլ ձերբակալությունը համարել էր ոչ իրավաչափ ու ազատել արգելանքից՝ գտնելով, որ բացակայում է հիմնավոր կասկածը։
Ավելի վաղ «Փաստինֆո»-ն հայտնել էր, որ քաջարանցիների դեմ ցուցմունք տվող անձը հրաժարվել է իր նախնական ցուցմունքից և հայտարարել,որ դրանք տվել է ճնշման տակ եւ որ իրեն տուժող չի ճանաչում։ Այդուհանդերձ՝ նախաքննական մարմինը երեք կասկածյալներին մեղադրանք է առաջադրել ու կալանավորումը որպես խափանման միջոց կիրառելու մասին միջնորդություն ներկայացրել դատարան։
Մայիսի 28-ին Երևանի ընդհանուր իրավասության դատարանը՝ դատավոր Արտուշ Գաբրիելյանի նախագահությամբ, մերժել էր քաջարանցիներից մեկին՝ Մարատ Ստեփանյանին կալանավորելու մասին քննիչի միջնորդությունը՝ հիմնավոր կասկածի բացակայության հիմքով, իսկ Երևանի ընդհանուր իրավասության դատարանը՝ դատավոր Վաչե նախագահությամբ, այսօր բավարարել էր Լևոն Համբարձումյանին կալանավորելու միջնորդությունը։
Այսպիսով՝ երեք մեղադրյալներից երկուսը կալանավորվել են։ Փաստաբանը հայտարարել է, որ դրանք բողոքարկելու են։