Ապրիլյան էսկալացիայի իրադարձությունների քննիչ հանձնաժողովի նիստին կմասնակցի ԱԳ նախկին նախարարը
Ազգային ժողովում Պաշտպանության եւ անվտանգության հարցերով մշտական հանձնաժողովի նիստում հանձնաժողովի նախագահ, իշխող «Իմ քայլը» դաշինքի պատգամավոր Անդրանիկ Քոչարյանը հայտարարեց, որ չի հասկանում ընդդիմությունից իր գործընկերների դիրքորոշումը, որոնք բոյկոտել էին նաեւ 2016 թվականի ապրիլյան էսկալացիայի իրադարձությունների եւ հանգամանքների քննիչ հանձնաժողովի աշխատանքը:
Քոչարյանը հայտնեց նաեւ, որ այս պահին իրենք լուծում են որոշակի տեխնիկական հարցեր, եւ ավելի շուտ վաղը տեղի կունենա 2016 թվականի ապրիլյան էսկալացիայի իրադարձությունների քննիչ հանձնաժողովի հերթական նիստը, որին մասնակցելու է ԱԳ նախկին նախարար Էդվարդ Նալբանդյանը. «Նալբանդյանը տվել է իր համաձայնությունը եւ կպատասխանի մեր հարցերին»: