«Մարտի 1»-ի 10 զոհի արյունը Լևոն Տեր Պետրոսյանի և Նիկոլ Փաշինյանի ձեռքերի վրա է. Կոնստանտին Տեր-Նակալյան (video)
«Այս իշխանությունը վաղուց է ապացուցել, որ իրենք չունեն ոչ մի սրբություն, իրենք մանրախնդիր մարդիկ են ու պատրաստ են լխճել ցանկացած դրական սիմվոլիզմ ու նենգափոխել սրբապղծությամբ: Ինչ է նշանակում Շուշիի ազատագրման օրը նիստ նշանակել, ու դատավարություն վարել մի մարդկանց, ովքեր Շուշին ազատագրել են: Ընդ որում դատական նիստին մերժել՝ հերթական անգամ ապտակ հասցնելով: Ըստ երևույթին իրենք հույս ունեն, որ այս ցինիզմի նկատմամբ ընդվզում չի լինելու, մարդիկ չեն քննադատելու, ու մի գեղեցիկ օր իրենք կարողանալու են դասագրքերում սովորացնել, որ Շուշին իրականում ազատագրել է Նիկոլ Փաշինյանն ու Ստյոպա Սաֆարյանը՝ քարեր շպրտելով»,- լրագրողների հետ զրույցում ասաց «Ադեկվադ» միաբանության անդամ Կոնստանտին Տեր-Նակալյանը՝ անդրադառնալով Ռոբերտ Քոչարյանի խափանման միջոցը փոխելու վերաբերյալ միջնորդությանը:
«Ժողովուրդը պիտի տեսնի, թե այժմ ով է իշխանության, և ով է դատվում: Դերերի փոխանակություն, այդ թվում դատարանում ամբաստանյալի կարգավիճակում գտնվող լինելու է, ու դա տեղի կունենա շատ շուտով: Այս օրով մենք ԱԺ-ում ականատեսը եղանք խայտառակ միջադեպի, տեսնում ենք, որ այս մարդիկ լրիվ հարբել են այդ իշխանությունից: Մարդիկ, ովքեր ամեն ինչ կուլ էին տալիս ու մարսում էին տարիներ առաջ, այսօր ամեն չնչին հարցից պատրաստ են նետվել ձեռնամարտի՝ թքած ունենալով ոչ միայն պետպաշտոնյայի և էթիկայի կանոնների վրա, այլ առհասարակ մարդկային բարեկրթության կանոնների վրա»,-ասաց Կոստանդին Տեր-նակալյանը:
«Հանրությունը պիտի նայի ու կողմնորոշվի, թե ինքն ում հետ է: Այդ դիլեմայի ժամանակը եկել է, կարծում եմ՝ շաբաթների հարց է: Մեր հասարակությունը կկողմնորոշվի՝ արդյոք ուզո՞ւմ է իր տանը երեխաները տեսնեն հեռուստացույցով այն, ինչ տեսնում են, ապրել մի իրականությունում, որտեղ իրենց ապագան կախված է այդ որակի մարդկանցից ու այդ որակի իշխանություններից»,- ասաց Տեր-նակալյանը:
Ինչ վերաբերում է դատական նիստին, նա ասաց, որ այնուամենայնիվ վերջում կհաղթի արդարությունը ու պատմության այս ամոթալի դրվագը լինելու է դասագրքային օրինակ, թե ինչու չի կարելի երկրի ապագան վստահել ամբոխի քմահաճույքին: Նա նաև ասաց, որ գործով դատավոր Աննա Դանիբեկյանը Ֆաուստի «Գործարք»-ն է կնքել : «Մենք 2 տարի է քննարկում ենք, որ այս գործը ջուր է, մարդուն անիմաստ դատում են, եթե «Մարտի 1»-ով մարդ պիտի դատվի, ապա այդ մարդը հաստատ Քոչարյանը չէ, այլ Լևոն Տեր Պետրոսյանը ու Նիկոլ Փաշինյանը: «Մարտի 1»-ի 10 զոհի արյունը Լևոն Տեր Պետրոսյանի և Նիկոլ Փաշինյանի ձեռքերի վրա են, ու մի օր նրանք դրա համար պատասխան են տալու»,- ասաց Կոնստանտին Տեր- Նակալյանը։