Նորից պարգեւավճարների մասին
Հրապարակը գրում է.
Օրերս հայտնի դարձավ, որ 2-րդ եռամսյակի համար նախատեսված Ազգային ժողովի շուրջ 700 աշխատակիցների եւ պատգամավորների պարգեւատրման ողջ ֆոնդը, ինչպես նաեւ ներկայացուցչական ծախսերի, էներգետիկ ծառայությունների եւ այլ բյուջետային տողերով նախատեսված միջոցները հետ կվերադարձվեն բյուջե՝ կորոնավիրուսի պայքարի նպատակով: Այսինքն պատգամավորները եւ աշխատակազմը ապրիլ, մայիս, հունիս ամիսներին կզրկվեն աշխատավարձի 30 տոկոսի չափով ստանալիք պարգեւավճարները:
ԱԺ մեր աղբյուրների փոխանցմամբ՝ այս որոշումը ծանր են ընդունել ոչ միայն 120-150 հազար դրամ աշխատավարձ ստացող շարքային աշխատակիցները, այլեւ մոտ կես միլիոն աշխատավարձ ստացող պատգամավորները:
Հատկապես բուռն քննարկում է ծավալվել իշխող թիմում, որտեղ հակադրվողները փաստարկել են, թե իրենք աշխատավարձով ապրող, կողմնակի եկամուտ չունեցող, բյուջեն չթալանող պատգամավորներ են, պարզ ասած՝ մի կերպ յոլա են գնում, ինչու պիտի իրենց պարգեւավճարներից զրկվեն: Ավելի վաղ գրել էինք, որ աշխատակազմն է դժգոհ, քանի որ շատերի համար 20-30 հազար հավելյալ գումարը խիստ անհրաժեշտություն է:
Հիշեցնենք, որ ԱԺ աշխատակազմը մարտ ամսվա պարգեւավճարները՝ 30 տոկոսի չափով ստացել է։