Կորոնավիրուսից ավելի վտանգավոր է․Վաղը-մյուս օրը գալու եք ասեք՝ կառավարություն, խի՞ քայլ չէիր ձեռնարկում. Հովհաննես Հովհաննիսյան
ԱԺ «իմ քայլը» խմբակցության պատգամավոր Հովհաննես Հովհաննիսյանն այսօր ԱԺ արտահերթ նիստի ժամանակ ասաց, թե կորոնավիրուսից ավելի վտանգավոր է այն մանիպուլյացիան, որն ըստ նրա կա թե՛ խորհրդարանի դահլիճում, թե՛ այնտեղից դուրս։
«Ես կարծում եմ՝ կորոնավիրուսից ավելի վտանգավոր է այն մանիպուլիացիան, որին ականատես ենք լինում, թե′ այս դահլիճում, թե′ այս դահլիճից դուրս։ Այդ մանիպուլիացիան դրսևորվում է տարբեր ձևերով, առանց օրինագիծը կարդալու, մենակ մամուլի վերնագրերը կարդալով, վերցնում և հետևություններ են անում բազմաթիվ հարցերի մասին։ Ես երեկ ունեցել եմ մտահոգություններ, որից հետո պարոն Ավինյանը եկել է, մոտ երկու ժամ լսել ենք իր տարբեր բացատրությունները, ունեցել ենք հանդիպում Ucom ցանցի մասնագետների հետ, նաև այդ մասով ենք զրուցել և համատեղ առաջարկ ենք ներկայացրել, որն ընդգրկվելու է կառավարության այն կարգի մեջ, որով պետք տվյալները ոչնչանան և այդ տվյալների ոչնչացումն է հիմնական խնդիրը այս օրինագծի հետ կապված։
Վաղը-մյուս օրը, որ երկրում ստեղծվի առողջապահական վատ վիճակ, գալու եք ասեք՝ կառավարություն, խի՞ քայլ չէիր ձեռնարկում։ Հիմա կառավարությունն ասում ՝ ինձ տվեք այս գործիքը, գնամ հետագծերը հայտնաբերեմ։ Մենք ասում ենք՝ տվյալների հետ կապված ունենք խնդիր, մտահոգություն, որը պետք է փարատվի, դրա համար առաջարկում ենք, որ ընդդիմության ներկայացուցիչներից պարտադիր մարդիկ ընդգրկվեն և այդ մարդիկ ներկա լինեն տվյալների ոչնչացմանը՝ իրենց մասնագետներով։ Նաև առաջարկել ենք՝ հասարակական սեկտորի և կազմակերպությունների ներգրավում։ Բանավոր համաձայնություն է եղել, որ կառավարության կարգում, որը պետք է լինի, այս հարցերի պատասխանները տրվեն, որ որևէ մեկի մոտ բաց հարց չմնա»,-ասաց նա։»։