«Հիմա, երբ արդեն 400-ն անցել ենք, սա անիմաստ կարգավորում է, պարոն նախարար, ուշ է»․ Էդմոն Մարուքյանը՝ Ռուստամ Բադասյանին
ԱԺ-ում համաճարակի հետևանքով անձնական տվյալների պաշտպանության, մասնավոր և ընտանեկան կյանքի անձեռնմխելիության, հաղորդակցության ազատության և գաղտնիության իրավունքներին միջամտելու մասին նախագծի քննարկմանը «Լուսավոր Հայաստան» խմբակցության ղեկավար Էդմոն Մարուքյանը հարց բարձրացրեց, թե արդյոք այս որոշումն ուշացած չէ:
Նա ընդգծեց, որ կառավարության ներկայացրած օրեսդրական նախաձեռնությունը միգուցե կարող էր արդյունավետ լինել այն ժամանկ, երբ ունեինք մեկ հիվանդ․
«Հիմա, երբ արդեն 400-ն անցել ենք, սա անիմաստ կարգավորում է, պարոն նախարար, ուշ է։ Հիմա այսքան ուշ նման նախաձեռնություն բերել և մեր քաղաքացիների իրավունքները սահմանափակել, անընդունելի է, և մենք չպետք է դարերով պայքարների արդյունքում մարդկանց ազատությունները հիմա զիջենք նման իրավիճակներում։ Ավելին, նաև վստահություն չկա, թե այդ տվյալներն ինչպես են մշակվում, ում մոտ է մշակվում ու ինչ կարող են անել ընդհանրապես»։
Այնուհետև Մարությանը հավելեց, որ թող ոչ մեկը չմտածի, որ իր տվյալներին այս որոշումը չի վերաբերում:
«Ըստ էության, խոսքը բոլոր մեր քաղաքացիների տվյալներին է վերաբերում, ընդ որում, երբ ախտորոշվել է և մեկուսացված է, այդ օրվանից սկսած՝ հսկողության առումով ես խնդիր չեմ տեսնում: Ես խնդիր եմ տեսնում, երբ մարդը չգիտի, որ կարող է հետ գնան և իր բոլոր տվյալները ստուգեն՝ որտեղ է եղել, որտեղ է զանգել, ում հետ է շփվել: Սրանով ռետրոսպեկտիվ բացում ենք էդ պանդորայի արկղը և հետ ենք գնում և իր ամբողջ կոնտակտների շրջանակը ստուգում»,- ասաց պատգամավորը: