Կորոնավիրուսի կասկածով հիվա՞նդ է տեղափոխվել «Նորք» ինֆեկցիոն կլինիկա․ հիվանդանոցից պարզաբանում են
Տեղեկություններ են տարածվել, թե «Արմենիա» Հանրապետական բժշկական կենտրոնից մեկ հիվանդի բարձր ջերմությամբ տեղափոխել են «Նորք» ինֆեկցիոն կլինիկական հիվանդանոց և հիվանդի մոտ ի հայտ եկած ախտանիշները բժիշկների կողմից կասկածվում է կորոնավիրուսի հավանականություն: Նշվում է, որ հիվանդը 20 օր շարունակ ջերմային տենդի մեջ է գտնվել, դիմելով «Արմենիա» ԲԿ, 2 ժամ տևած հետազոտություններից անմիջապես հետո տեղափոխվել է ինֆեկցիոն կլինիկական հիվանդանոց:
ԼՈՒՐԵՐ․com-ի հետ զրույցում «Նորք» ինֆեկցիոն կլինիկական հիվանդանոցից հերքեցին տեղեկությունը՝ նշելով, որ սխալ լուրեր են տարածվել և «Արմենիա» Հանրապետական ԲԿ-ից ոչ մի հիվանդ իրենց մոտ չի տեղափոխվել։
«Մեզ մոտ կորոնավիրուսով հիվանդ չկա»,- վստահեցրին հիվանդանոցից։
Նշենք, որ ՀՀ առողջապահության նախարարությունը հայտարարել է, որ շարունակվում են նոր կորոնավիրուսային վարակի (CՕVID-19) դեմ պայքարի համալիր միջոցառումները: Բժշկական կազմակերպություններն ապահովված են անհրաժեշտ բժշկական պարագաներով: Երկիր է ներկրվել նոր կորոնավիրուսային վարակի (CՕVID-19) ախտորոշման համար թեստերի նոր խմբաքանակ: Չնայած Առողջապահության համաշխարհային կազմակերպության կողմից Նոր կորոնավիրուսային վարակի (CՕVID-19) բուժման ուղղությամբ այսօր որևէ կոնկրետ դեղ չի առաջարկվում, նախարարության մասնագետները ուսումնասիրել են թե՛ Չինաստանի, թե՛ այլ երկրների կողմից առաջարկվող փորձը, ինչի արդյունքում մշակվում է նոր կորոնավիրուսային վարակով (CՕVID-19) պացիենտների վարման ընթացակարգ։