Նոր մանրամասներ Երևանում բնակարանային գողություններից հետո վթարի ենթարկված կասկածյալներից. նրանցից մեկը կալանավորվել է
Հայաստանի քննչական կոմիտեի Երևան քաղաքի քննչական վարչության Ավան և Նոր Նորք վարչական շրջանների քննչական բաժնի պետի պաշտոնակատար Վահե Լաչինյանի որոշմամբ ստեղծված քննչական խմբի ղեկավար, նույն քննչական բաժնի հատկապես կարևոր գործերով ավագ քննիչ Օգսեն Հարությունյանը միջնորդություն է ներկայացրել Երևան քաղաքի ընդհանուր իրավասության դատարան, որպեսզի դատարանը որպես խափանման միջոց երկամսյա կալանքի որոշում կայացնի Երևան քաղաքի Բագրատունյաց 4-րդ նրբանցքի բնակիչ, 36-ամյա Հակոբ Տաշչյանի նկատմամբ:
Ինչպես հայտնում է Shamshyan.com-ը, վերջինիս նկատմամբ քրեական գործ է հարուցվել ՀՀ քր օր-ի 177 հոդվածի 3-րդ մասի 1.1 կետի հատկանիշներով: Դատավորը դռնփակ դատական նիստն անցկացնելուց և խորհրդակցական սենյակից վերադառնալով՝ բավարարել է քննիչի միջնորդությունը և Հ. Տաշչյանը դատարանից տեղափոխվել է քրեակատարողական հիմնարկ: Աղբյուրի տեղեկություններով՝ նա նախկինում ՀՀ քր օր-ի մի քանի հոդվածներով եղել է դատապարտված:
Հաղորդվում է, որ փետրվարի 19-ին գողություն էր տեղի ունեցել Երևանի բնակիչ Վլադիմիր Ա.-ի տանից և ոստիկանության Նոր Նորքի բաժնի քրեական հետախուզության բաժանմունքի ծառայողները, իրացնելով ստացված օպերատիվ տվյալները, գողություն կատարելու կասկածանքով Մոլդովական փողոցի 50/1 շենքի մոտ մոտեցել են NIssan մակնիշի 36 ՏV 111 համարանիշի ավտոմեքենային, որի վարորդն ու ուղևորը նշված ավտոմեքենայով դիմել են փախուստի և Գայի պողոտայի 31 շենքի մոտ կորցնելով ավտոմեքենայի կառավարումը, ինքնավթարի են ենթարկվել՝ դուրս գալով ճանապարհի երթևեկելի գոտուց և բախվել ծառերին: Կարճ ժամանակ անց Հ. Տաշչյանին ոստիկանները հայտնաբերել են և գողություն կատարելու կասկածանքով բերման ենթարկել ոստիկանության Նոր Նորքի բաժին:
Պարզվել է, որ Հ. Տաշչյանը ևս մեկ այլ անձի հետ Մոլդովական 30/2 շենքի բնակչուհի Ծովինար Ա.-ին պատկանող 2 բնակարաններից տեխնիկական միջոցների գործադրմամբ պատուհանի ճաղավանդակի կախովի փականը կոտրելու միջոցով կատարել են զգալի չափերի գողութուն: Նրանք տանից գողացել են «Սամսունգ» մոդելի հեռուստացույց, ոսկյա մատանի, արծաթյա շղթա, կախազարդ, օվալաձև կանաչ քարով մետաղյա վզնոց, մանկական մուշտակ, արծաթյա մատանի, անգամ կանացի կոստյում, իսկ Մոլդովական փողոցի 50/4 շենքի բնակիչ Վլադիմիր Ա.-ի բնակարանից նույն եղանակով հափշտակել են հեռուստացույցը: Ոստիկաններն ու քննիչներն ունեն կասկածներ, որ Հ. Տաշչյանը իր հանցակից ընկերների հետ հնարավոր է՝ այլ գողություններ արած լինեն: Փաստի առթիվ հարուցված քրեական գործի նախաքննությունը շարունակվում է: