«Անձամբ կկտրեմ իմ երկու ձեռքերը, բայց մեկ քվեաթերթիկի կեղծիք թույլ չեմ տա». ՀՀ վարչապետ
«Քաղաքացիական պայմանագիր» կուսակցության կազմակերպած դրամահավաքին ՀՀ վարչապետ Նիկոլ Փաշինյանը հայտարարեց. «Հնարավոր չէ ունենալ հզոր, կայացած, մրցունակ, ժողովրդավարական պետություն՝ առանց ինստիտուտների: Այս ճանապարհը, որն անցնում ենք, ինստիտուտների կայացման ճանապարհ է: ՀՀ-ում չի կարող լինել որևէ օղակ, որը չի ներկայացնում ժողովրդին, իսկ գործող Սահմանադրական դատարանը, ըստ նրա, որևէ կապ չունի Հայաստանի Հանրապետության ժողովրդի հետ և վայելում է ժողովրդի բացարձակ մեծամասնության անվստահությունը»:
««Այո»-ի շտաբն առաջիկայում ինտենսիվ քարոզարշավ է սկսելու, և ես անձամբ էլ ակտիվ քարոզչական հանդիպումներ եմ անցկացնելու Հայաստանի բոլոր քաղաքներում: Մենք հույս ունենք, որ հանրաքվեի արդյունքներով «Այո»-ն կհաղթի, դա մեր հույսն է, և դրա համար անելու ենք մեզնից կախված ամեն ինչ, բայց անկախ արդյունքներից՝ հաղթելու է Հայաստանի Հանրապետության արժանապատիվ, հպարտ քաղաքացին: Այս քաղաքական թիմը կկտրի սեփական ձեռքերը, բայց մեկ քվեաթերթիկի կեղծիք թույլ չի տա: Ես անձամբ կկտրեմ իմ երկու ձեռքերը, բայց մեկ քվեաթերթիկի կեղծիք թույլ չեմ տա, հակառակ դեպքում դա կնշանակի ջնջել մեր ապրած ամբողջ կյանքը, այն բոլոր արժեքները, որի վրա մենք կանգնած ենք»,- եզրափակեց վարչապետը: