Կոթի գյուղի ուղղությամբ վաղ առավոտյան ինտենսիվ կրակոցները շարունակվել են
Կոթի գյուղի ուղղությամբ այսօր առավոտյան՝ ժամը 7.30-ի սահմաններում արձակվել են ինտենսիվ կրակոցներ։ Այս մասին «Փաստինֆո»-ի հետ զրույցում ասաց Կոթի գյուղի ղեկավար Ֆելիքս Մելիքյանը։ Նրա փոխանցմամբ՝ կրակոցները տևել են մոտ 20 -25 րոպե։
«Մոտ 40 րոպե դադարից հետո կրկին կարճ կրակահերթեր են հնչել։ Այս պահին դադար է։ Իրավիճակը հանգիստ է։ Այսօրվա կրակոցներից տուժածներ չկան։ Նյութական վնասների մասին դեռևս հստակեցված չէ»,- ասաց Մելիքյանը։
Նրա խոսքով՝ անցած օրը սահմանին նույնպես կրակոցներ են եղել, ինչի հետևանքով զինծառայող է վիրավորվել։
Ավելի վաղ հայտնել ենք, որ երեկ ադրբեջանական ԶՈւ-երի ստորաբաժանումները կրակ են բացել ՀՀ ԶՈւ-երի ստորաբաժանումների մարտական դիրքերի ուղղությամբ: Կրակից վիրավորվել է հայ զինծառայող, վիրավորումը թեթև է, նրա կյանքին վտանգ չի սպառնում: Հայկական ԶՈւ-երի ստորաբաժանումների պատասխան կրակից հետո ադրբեջանական կրակը դադարել է։
Հետևեք մեզ Viber-ում
