Հայաստանում պետք է ընդունվի օրենք, որը կարգելի զինծառայություն չանցածներին բարձր պաշտոններ զբաղեցնել
politik.am-ը գրում է.Հունվարի 28-ը Հայոց բանակի կազմավորման օրն է: Հայաստանի 3-րդ Հանրապետության զինված ուժերը 28 տարեկան է։
Պատերազմական իրավիճակում գտնվող մեր երկրի անվտանգության միակ և բացառիկ երաշխավորը շարունակում է մնալ Հայոց բանակը։
Այս տեսանկյունից կարևոր է, թե պետության ղեկավարները ինչպիսի վերաբերմունք ունեն բանակին և որքան են գիտակցում բանակի կարևորությունը։ Իսկ կարևորությունը դժվար է գիտակցել, եթե չես կանգնել այդ բանակի շարքերում։
Ցավալի է արձանագրել, որ մեր պետության այսօրվա իշխող վերնախավը օրգանական որևէ կապ չունի բանակի հետ։ Ամենատարբեր պատճառներով զինվորական ծառայություն չեն անցել վարչապետ Նիկոլ Փաշինյանը, փոխվարչապետ Տիգրան Ավինյանը, ԱԺ նախագահ Արարատ Միրզոյանը, տարբեր նախարարներ ու իշխանական խմբակցության պատգամավորներից շատերը։ Բանակից խուսափել են նաև նախագահ Արմեն Սարգսյանի տղաները։
Այս ընթացքում մամուլում հայտնվել են բազմաթիվ հրապարակումներ, որոնք առնվազն կասակածի տեղիք են տալիս այս կամ այն բարձրաստիճան պաշտոնիայի բանակում չծառայելու օրինական հիմքերի մասով։
Ու այսօր առնվազն տհաճ է, երբ բանակում չծառայածները խոսում են բանակի ձեռբերումներից և հանրությանը փորձում են համոզել, որ դրանցում իրենք էլ ներդրում ունեն։
Ի վերջո, կարծում ենք Հայաստանում պետք է ընդունվի օրենք, որը կարգելի ԶՈՒ չծառայած արական սեռի քաղաքացիներին պետական բարձրաստիճան պաշտոն զբաղեցնել։ Պետության անվտանգությունը առաջնագծում չպահածները իրավունք չպետք է ունենան տաքուկ գրասենյակներում որոշումներ կայացնել պետության անունից։