Վարչապետի ներկայացրած գրիչն ապացուցեց, որ իրենք Թովմասյանի դեմ ոչինչ չունեն, այլապես կներկայացնեին և խայտառակ չէին լինի
ՀՀ վարչապետ Նիկոլ Փաշինյանը նախ խոսեց Սահմանադրական դատարանի նախագահի կողմից իբր իրեն ծառայություններ առաջարկելու մասին ու որպես փաստ ներկայացրեց գրիչը, սա խոսում է այն մասին, որ իշխանությունը ոչինչ չունի Թովմասյանի դեմ, ու Թովմասյանը ոչինչ չի արել:
Սահմանադրական դատարանի նախագահ Հրայր Թովմասյանի հասցեին Նիկոլ Փաշինյանի արած հայտարարությունների, գրառման և այլ հարցերի շուրջ Tert.am-ի հետ զրույցում ասաց փաստաբան Լուսինե Սահակյանը:
-Տիկի´ն Սահակյան, որքանով է նորմալ, որ երկրի վարչապետն ամփոփիչ ասուլիսի ժամանակ հայտարարում է, որ Սահմանադրական դատարանի նախագահ Հրայր Թովմասյանն իրեն իր ծառայությունները մատուցելու առաջարկ է արել, հետո գրում է, որ անհամարժեք ապացույց ունի, ու այդ ապացույցը զուտ մի միջոցառման ժամանակ իրեն Թովմասյանի տված ու հետ չվերցրած գրիչն է:
-Դա ցավալի փաստ է, նկատի ունենալով, որ այդ խոսքերը հնչում է պետության ղեկավարի բերանից, ոչ թե սովորական քաղաքացու, կամ գոնե լավ, իր թիմից որևէ մեկի բերանից: Պետության ղեկավարն ասուլիսին միտք է ասում, որ Հրայր Թովմասյանն իր ծառայություններն է առաջարկել: Սա արդեն լուրջ խնդիր է: Այնուհետև եղավ ՍԴ նախագահի արձագանքն առ այն, որ հիմնավորող փաստեր չներկայացնելու դեպքում զրպարտության հայտով կդիմեն դատարան: Հիմա, բնականաբար, հասարակությունը սպասում է այդ փաստերին, չէ՞ որ պետության ղեկավարը չի կարող նման հայտարարություն անել առանց փաստի ու լուրջ սպասում է ինքն այդ փաստին: Ընդ որում, իր քաղաքական թիմն ու աջակիցներն աղմուկ էին բարձրացրել, թե տեսեք՝ հիմա ինչ կկատարվի Հրայր Թովմասյանի հետ: Այս ընթացքում հրապարակվում է հայտնի լուսանկարը, թե իբր Հրայր Թովմասյանն է՝ ձեռքով Փաշինյանին բարևում, դա թերևս ծառայեցնելու էին որպես փաստ:
-Բայց դա պատահական տարածում չէր, դա տարածեց ԱԺ պատգամավոր Արման Բաբաջանյանը:
-Այո, և հատկանշական է, որ այդ լուսանկարում Հրայր Թովմասյանը չէր: Որքան հասկացա, դա էր լինելու իրենց փաստը, սակայն պարզվեց, որ դա չէր փաստը, և Նիկոլ Փաշինյանը որոշեց հրապարակել իր «անհամարժեք» փաստը: Շատ ցավալի է, ես վատ եմ զգում՝ որպես այս երկրի քաղաքացի, իմ երկրի վարչապետի համար, որ իմ երկրի վարչապետն այդ գրիչը կարող է ներկայացնել որպես փաստ, այն էլ այն հանգամանքի, որ Հրայր Թովմասյանն իր ծառայություններ է իրեն առաջարկել:
-Այդ «փաստն» ի՞նչ արեց ի վերջո, բացի այն քննադատություններից, որոնք ստացավ Փաշինյանը, բացի այն, որ լռեց իր քաղաքական թիմը, որը նախքան այդ խոսում էր, սպառնում էր, թե ինչ է լինելու Հրայր Թովմասյանի հետ:
-Դրանով Փաշինյանի մամուլի ասուլիսի ժամանակ հնչեցրած միտքը՝ ծառայություններ մատուցելու մասին, հենց Փաշինյանը հերքեց, որովհետև ասաց, որ Թովմասյանին երբևէ չի հանդիպել, այլ մի անգամ հանդիպել է այդ գրիչի օրը, և մյուսն էլ պատարագի օրը: Հիմա լուրջ մարդն ինչպե՞ս կարող է սա ընկալել: Այսինքն՝ քաղաքավարի լինելը ՀՀ-ում ընդունված չէ այլևս, տարրական կուլտուրան, որ անձը տեսնում է, որ գրիչ չունի, ու իր գրիչն է տալիս, ենթադրում է ծառայություներ մատուցելու առաջարկ ու չի կարելի քաղաքակիրթ լինել: Սա՞ է պահանջում վարչապետը:
-Իսկ եթե վարչապետի միակ փաստը գրիչն էր, ինչո՞ւ էր նման հայտարարություն անում ասուլիսի ժամանակ:
-Վարչապետն էլ է հասկանում, որ ինքը չուներ փաստեր, բայց, ամենայն հավանականությամբ, ինքը չէր սպասում, որ Հրայր Թովմասյանը նման հայտարարությամբ հանդես կգա ու փաստեր կպահանջի իրենից: Երևի մտածում էր, որ, ինչպես միշտ, իր խոսքն անցել է շատերի մոտ, կարող է և այս ընթացքում էլ անցնի: Բայց ինքը պետք է հասկանա, որ այդպես չէ, կան մարդիկ, որոնք իրենց իրավունքները պաշտպանում են, որոնք երբևէ իրենց անվան հետ կապված սուտ տեղեկություններն անհետևանք չեն թողնելու և պահանջելու են փաստեր, ինչը և արվում է:
Բայց մենք տեսնում ենք, որ երբ պահանջում են փաստեր, հերքումներ են ցանկանում, երբ ապատեղեկատվություն են որակում և այլն, հարձակման են ենթարկվում: Ես ուղղակի, հերթական անգամ խորհուրդ կտամ վարչապետին, որ իր յուրաքանչյուր միտքն ասելուց առաջ մտածի և նոր արտահայտվի: Մտածի և հասկանա, որ նա այլևս երկրի վարչապետ է, նա ընդդիմադիր պատգամավոր չէ, սովորական քաղաքացի չէ, որ ինչ-որ մտքեր արտահայտի, և դա միգուցե անպատասխան մնա և հետևանքներ չունենա, այստեղ արդեն հետևանքները երկրի համար են լինում, որովհետև երկրի վարչապետը խոսում է ՍԴ նախագահի կողմից իրեն ծառայություն մատուցելու առաջարկ անելու մասին, սա շատ լուրջ խնդիր է, հետո գրիչը բերում է որպես օրինակ և ասում է, որ սա էլ փաստը:
-ՍԴ շուրջ ծավալվող իրադարձություներն ինչ սկսել են, հրապարակումներ կան, փաստեր կան, որ ուժային կառույցները, իրավապահ մարմիններն ինչ-որ բան են ման գալիս ՍԴ նախագահի վերաբերյալ, խուզարկություններ են արվում և այլն, ու վարչապետը, որպես ինչ-որ առաջարկների փաստ, ներկայացնում է միջոցառման ժամանակ իր մոտ մնացած գրիչը: Այսինքն՝ կա քրեական գործ և մի հատ գրիչ: Սա՞ է գտել ողջ համակարգը Սահմանադրական դատարանի նախագահի «դեմ»:
-Խնդիրը հենց այդ է, որ այդ գրիչով իրենք հիմնավորեցին, որ ոչինչ չունեն Սահմանադրական դատարանի նախագահի դեմ, որովհետև ունենալու պարագայում այսպիսի հնչեղ հայտարարություն անելուց հետո ինքը այդ փաստերը կներկայացներ: Բացի այդ, Հրայր Թովմասյանն էլ գիտի, չէ՞, թե ինքն ինչ է արել, ինչ չի արել, այնպես չէ, որ ՍԴ նախագահը ձեռնոց է նետել ու ասում է, որ ինքը մնալու է ՍԴ նախագահ, արդեն խոսում է այն մասին, որ Թովմասյանը վախենալու ոչինչ չունի: Բնական է, որ նրանք որևէ փաստ չունեն Թովմասյանի դեմ, այլապես կներկայացնեին և խայտառակ չէին լինի:
Հետևեք մեզ Viber-ում
