Մենք էլ, որ վաղը ընդդիմություն լինենք, այդպես ենք անելու. Արարատ Միրզոյան
«Կարծում եմ, որ իզուր են մեծամասնության կոչերն ընդդիմությանը՝ քվերակել կողմ այս նախագծերին, կան չգրված կանոններ. Ընդդիմությունը, որպես կանոն, բյուջեին, կառավարության ծրագրին, վարկային համաձայնագրերին կողմ չի քվեարկում:Հիմա այդպես է, մենք էլ որ ընդդիմություն լինենք վաղը կամ մյուս օր, մենք էլ ենք այդպես անելու: Սա նորմալ է, ֆիքսենք: Շատ լավ է, որ ընդդիմությունը գլխով հավանության նշան է անում: Սա հավաստում է, որ փաստարկներն իրականում կապ չունեն»,-վարկային համաձայնագրերը վավերացնելու հարցի քննարկման ժամանակ ասաց ՀՀ Ազգային ժողովի նախագահ Արարատ Միրզոյանը:
«Այս վարկային համաձայնագրերը, որքան էլ, որ տարօրինակ հնչեն, տնտեսագիտության հետ, իհարկե, կապ ունեն, բայց մեծ հաշվով տնտեսագիտության մասին չեն: Այս վարկային համաձայնագրերի կոնտեքստը քաղաքական է: Մեր գործերն էնքան լավ են, որ մեզ առաջարկում են էժան փող, շատ էժան փող: Մենք այնպիսի առաջընթացներ ենք արձանագրել տարբեր բարեփոխումների գծերով, մեր երկրի վստահությունը, կայունությունը, կանխատեսելիությունը միջազգային գործընկերների, այդ թվում՝ ֆինանսական հաստատությունների համար այնքան է աճել, որ իրենք գիտեն, որ թեև մենք իրենց պարտք ենք փող՝ 5 տոկոսով, առաջարկում են մեզ փող՝ 1.6 տոկոսով, թվերը պայմանական եմ ասում»,- ասաց Միրզոյանը:
Նա ընդգծեց՝ գիտեն, որ այս էժան փողը բերելու ենք դնենք տնտեսության մեջ, իսկ այլ միջոցներից էլ տանելու ենք, իրենց 5 տոկոսանոց վարկը մարենք: «Սա ակնհայտ, աներկբա և անքննելի շահավետ տարբերակ է ՀՀ համար, ես այսպես եմ ընկալում, թող հիմա մյուս հարցի ժամանակ տնտեսագետներն ասեն՝ սխալ եք ասում: Հրաժարվել այս առաջարկից՝ աբսուրդ է, այնպես որ մոռացեք բոլոր տնտեսական փաստարկները. սա քաղաքական հարց է, շատ շահավետ, և ընդդիմությունն էլ պետք է ասի՝ լավ չէ, ասում է՝ լավ չէ»,- շեշտեց նա:
Անդրադառնալով անհանդուրժողականության մեղադրանքներին՝ Միրզոյանն ասաց, որ առաջարկում է այս անհանդուրժողականության մասին դիսկուրսը դադարեցնել: «Այդպիսի բան չկա, ինչպես մեծամասնությունը պետք է հանդուրժող լինի տարբեր քննադատությունների նկատմամբ, այնպես էլ որևէ այլ կարծիք հնչեցնողը պետք է հանդուրժող լինի, որ մյուս կողմից էլ մեկն իր կարծիքի հետ համաձայն չէ. այստեղ կարմիր գիծն անձնական բաներն են, որը չպետք է թույլ տրվի որևէ կողմից, որևէ տեղից»,- եզրափակեց նա:
Հետևեք մեզ Viber-ում
