Ինչ պարզվել է Սերգո Կարապետյանի մասով, հայտնի էր վաղուց. ՀԿ նախագահ
«Այն, ինչ պարզվել է Հայաստանի նախկին գյուղտնտնախարար Սերգո Կարապետյանի մասով, ինձ համար նորություն չէր։Միշտ հայտնի է եղել, որ գյուղացիները սուբսիդիաները չեն ստացել, հացահատիկ չեն ստացել։ Քրեական գործեր են հարուցվել, բայց բոլորն ազատության մեջ են, ընդ որում, 2-3 մարդ 200-300 մլն-ի վնաս է հասցրել։ Թող Կարապետյանն ասի, թե ինչպես է նախարար դարձել, ումից ինչ է խնդրել, թող պատասխան տա իր արարքների համար։ Մենք այդ ու շատ այլ խնդիրներ բարձրացնում ենք ոչ առաջին տարին։ Բազմիցս բարձրացրել ենք հարցն այն մասին, որ Տիգրան Սարգսյանի օրոք գյուղացիների համար նախատեսված վառելիքը գնացել է լցակայաններ։ Մարդիկ այսօր էլ գալիս են ոչ թե աշխատելու, այլ փող ստանալու»,-Հայելի ակումբում լրագրողների հետ հանդիպման ժամանակ դեկտեմբերի 5-ին ասաց «Հայաստանի Ագրարագյուղացիական միություն» ՀԿ նախագահ Հրաչ Բերբերյանը։