Դավադիրների փնտրտուքն ընթացքի մեջ. իշխանությունը չի հրաժարվում իր գործիքից
Պաշտպանության և անվտանգության հարցերի մշտական հանձնաժողովը որոշում է կայացրել դիմել ԱԺ նախագահ Արարատ Միրզոյանին՝ 2016-ի ապրիլյան քառօրյա պատերազմի հանգամանքների ուսումնասիրության քննիչ հանձնաժողովի գործունեության ժամկետը ևս 6 ամսով երկարաձգելու համար։ Ազգային ժողովում ապրիլյան պատերազմի հանգամանքներն ուսումնասիրող քննիչ հանձնաժողով ստեղծելու անհրաժեշտության մասին մայիսի 20-ին հայտարարել էր վարչապետ Նիկոլ Փաշինյանը: Խոսելով Հայաստանի և Ղարաբաղի միջև տարաձայնություններ հրահրող «նախկին կոռուպցիոն համակարգի որոշ ուժերից»՝ Փաշինյանը կարծիք էր հայտնել, որ «հասունացել է 2016 թվականի ապրիլյան պատերազմի հանգամանքներն ուսումնասիրող Ազգային ժողովի քննիչ հանձնաժողով ստեղծելու ժամանակը»:
Մայիսի 30-ին իշխանական խմբակցության 47 պատգամավորների ստորագրությամբ ստեղծվեց 2016-ի ապրիլյան պատերազմի հանգամանքներն ուսումնասիրող քննիչ հանձնաժողով, որը բաղկացած է 11 պատգամավորից: «Իմ քայլը» խմբակցության պատգամավոր Անդրանիկ Քոչարյանի գլխավորած հանձնաժողովը, սակայն, անցնող վեց ամիսների ընթացքում այդպես էլ հասկանալի չդարձավ, թե ինչի համար են աշխատում: Ոչ առանցքային պաշտոնյաներ ներկայացան այդ հանձնաժողովի քննության, ոչ բացահայտումներ եղան, կանչվեցին միջին կարգի նախկին պաշտոնյաներ, շարքային զինվորներ, սպաներ, որոնց հայտնած տեղեկությունների հիման վրա, ըստ ամենայնի, կարիք չկա կանչել բարձրաստիճան նախկիններին:
Գաղտնիք չէ, որ քառօրյա պատերազմի հետ կապված, այսպես կոչված, «դավադրության տեսությունը» ունի ոչ միայն ներքին, այլ նաև արտաքին ասպեկտ: Ենթադրվում էր, որ Քոչարյանն ու իր գործընկերները կուսումնասիրեն նաև 2016-ի պատերազմը ծնող արտաքին գործոնները, մասնավորապես, որ պատրեազմը Ադրբեջան-Ռուսաստան պայմանավորվածության հետեւանք էր: Թերեւս հենց այս համատեքստում էր պետք դիտարկել Նիկոլ Փաշինյանի այն հայտարարությունը, որ Հայաստանում եւ Արցախում կան դավադիր ուժեր, որոնք պատերազմ են ընդհուպ հրահրում:
Իրականում պարզ է, որ քննիչ հանձնաժողովը ստեղծվել է իշխանության ներքաղաքական օրակարգ սպասարկելու նպատակով: Առայժմ հանձնաժողովը եւ այն գործարկողներն ունեն զրո հիմք՝ որեւէ ուժի եւ գործչի նման լրջագույն մեղադրանք ներկայացնելու համար: Անգամ չունեն հիմնավոր փաստեր նրանց հանձնաժողով հրավիրելու եւ հարցաքննելու համար: Ուշագրավ է, որ պաշտպանության նախարար Դավիթ Տոնոյանը անցած ամիս անդրադառնալով հանձնաժողովի գործունեությանը, հայտարարեց, թե բացառում է ապրիլյանի ժամանակ հայկական կողմի դավադիր գործողությունները, ինչը նշանակում է, որ իշխանության ներսում լավ են հասկանում, որ հանձնաժողովը ոչինչ անել չի կարող ու ընդամենը քաղաքական գործիք է պահվում նախկինների համար:
Անի Սահակյան