Շատերը ցանկանում են իրենց տղային ազատել բանակից և արտագաղթում են, ես ցանկանում եմ դա կանգնեցնել. Հայկ Սարգսյան
«Սիրելի հայրենակից, եթե դու ցանկանում ես վերադառնալ Հայաստանի Հանրապետություն, սակայն ինչ-ինչ հանգամանքներով չես կարողանում դա անել, քանի որ քո այսօրվա ապրելակերպին հակասում է երկու տարի ծառայելը և եթե նպատակահարմար ես գտնում ՀՀ վերադառնալ և ծառայել արագացված ընթացակարգով և վճարել օրենքով սահմանված գումար, խնդրում եմ դրա մասին հայտնեք ինձ, գրառումներ տեղադրեք ձեր սոցիալական ցանցերում: Ես առաջարկում եմ ֆլեշմոբ անել և գուցե այդ քաղաքացիների թիվը այնքան քիչ լինի, որ ես էլ մտածեմ նման նախաձեռնության իմաստ չկա»,-լրագրողների հետ զրույցում ասաց «Իմ քայլը» խմբակցության պատգամավոր Հայկ Սարգսյանը` ներկայացնելով «Զինվորական ծառայության և զինծառայողի կարգավիճակի մասին» ՀՀ օրենքում փոփոխությունների առաջարկը:
«Պաշտպանության նախարարությունը պետք է ուսումնասիրի օտարերկրյա փորձը, քանի որ ինքը նոր հեծանիվ չի հայտնագործել: Նախագծի արդյունքում հարուստներ և աղքատների տարանջատում չի լինելու: Տասը միլիոն դրամը հավասար է երկու պայմանագրային զինծառայողի երկու տարվա աշխատավարձին: Ես տասնյակ երկրների փորձ եմ ուսումնասիրել, որոնք կտեղադրեմ իմ ֆեյսբուքյան էջում»,-ասաց նա և չհայտարարեց, թե որ երկրների փորձն է ուսումնասիրել՝ չնայած լրագրողները մի քանի անգամ հարցրին այդ մասին:
Ըստ պատգամավորի` մեկ ամսվա ընթացքում հայ զինվորը կարող է սովորել Զինված ուժերում ծառայելու բոլոր կանոնները, որոշ մարտական զենքերից օգտվելու կարգը: Նա պարզաբանեց, որ այս օրենքը չի բացառում, որ մեր այն հայրենակիցները, որոնք զինապարտության տարիքում են, կարող են վերադառնալ և երկու տարի ժամկետով ծառայել, սակայն փորձը ցույց է տալիս, որ սահմանափակ քաղաքացիներ են վերադառնում:
Հայկ Սարգսյանը նշեց, որ իր թիմակից ընկերներից մի մասը ողջունում է օրենսդրական նախաձեռնությունը և հայտարարել են, որ իրենք նման մտահղացում են ունեցել:
«Հայաստանում շատերը ցանկանում են իրենց տղային ազատել բանակից, վաճառում են տունը և արտագաղթում են, ես ցանկանում եմ այդ արտագաղթը կանգնեցնել և ցանկանում եմ ՀՀ վերադարձնել այդ զրո զինծառայողին»,-ասաց նա:
Հայկ Սարգսյանը նաև նշեց, որ այն պայմանները որոնցով ծառայում են պայմանագրային զինծառայողները գուցե այդքան էլ գրավիչ չեն, պետք է այդ պայմանները դարձնել գրավիչ: «Ես սրանով խրախուսում եմ ՀՀ–ն չլքելը և ՀՀ վերադառնալը, ես առաջարկում եմ, որ ցանկացած ՀՀ քաղաքացի, ով մտածում է իր երեխային՝ արու զավակին ունենալ օրինակ՝ ԱՄՆ-ում, որ վերջինս չլինի զինապարտ, չգնա նման քայլի»,-ասաց նա:
Պատգամավորը նշեց, որ բոլորը ցանկանում են, որ առաջնագծում չլինեն 18 տարեկաններ, առաջնագիծը պահող զինվորները ստանան կրկնակի, եռակի աշխատավարձ, բայց պետք է նայել, թե այդ միջոցները որտեղից: «Դա նմանվում է չորրորդ դասարանի երեխայի շարադրության, ով ասում է, որ երբ լինեմ վարչապետ կամ նախագահ, այնպես կանեմ, որ բոլորը լավ ապրեն: Ես կոնկրետ ցույց եմ տալիս գումարի տեղը, առաջարկում կոնկրետ կարգավորում»,- ասաց նա և նշեց, որ չի պատրաստվում հետ կանգնել այդ մտքից, թեև պատրաստ է քննարկումների: