Վարչապետը Գարեգին Նժդեհի և 1918 թ. Մայիսյան հերոսամարտերի մասին ունի ոչ ստույգ գիտելիքներ․ պատմաբան
Ցավալի է, որ մեր երկրի վարչապետը Գարեգին Նժդեհի և 1918 թ. Մայիսյան հերոսամարտերի մասին ունի ոչ ստույգ գիտելիքներ:
Այս մասին ArmDaily.am-ի հետ զրույցում ասաց պատմաբան Արտակ Մովսիսյանն՝ անդրադառնալով ՀՀ վարպետ Նիկոլ Փաշինյանի՝ ռուսաստանցի լրագրողի՝ Գարեգին Նժդեհի մասին հարցի պատասխանին, որի ընթացքում վարչապետը նշել էր, որ Նժդեհը հայտնի է դարձել Սարդարապատի ճակատամարտով։
«Գարեգին Նժդեհը մասնակցել է ոչ թե Սարդարապատի, այլ Ղարաքիլիսայի ճակատամարտին և վիրավորվել այնտեղ: Ահա և ձեզ մի փաստարկ-հիմնավորում ևս, թե ինչու է պետք բուհերում պարտադիր ուսումնասիրել Հայոց պատմություն»,-ընդգծեց պատմաբանը:
Նա նաև նշեց, որ համամիտ է վարչապետի այն դիրքորոշմանը, որ ռուսները կամ որևէ դրսի ուժ պետք չէ, որ գան և հայերիս սովորեցնեն մեր պատմությունը: «Ես փոխարենը կառաջարկեի շատ արագ մի քանի լեզուներով թարգմանել Նժդեհի կյանքին ու գործունեությանը նվիրված նյութեր (գրքեր, փաստագրական ֆիլմեր և այլն), որոնցում կլուսաբանվեր նաև նացիստների հետ համագործակցելու Գարեգին Նժդեհի, Արտաշես Աբեղյանի, Դրաստամատ Կանայանի և նրանց գործակիցների իմաստուն որոշումը: Դրա անհրաժեշտությունը պետք էր զգալ Իլհամ Ալիևի հայտնի ելույթից անմիջապես հետո»։
Անդրադառնալով Մոլոտովի հետ վարչապետի նշած զուգահեռներին՝ պատմաբանն ասաց, որ վարչապետն այդ պահին պետք է աներ մի սուր հակադարձում և արեց՝ վկայակոչելով Ռուբենտրոպ-Մոլոտովի պակտը, որն ուսումնասիրողները կոչում են նաև Հիտլեր-Ստալին պակտ: Ցանկալի կլիներ, որ ընդգծվեր նաև նրանց տարբերությունը: «Եթե Մոլոտովը Ստալինի անունից նացիստների հետ դաշինք էր կնքում և Գերմանիայի հետ կիսում Լեհաստանն ու Մերձբալթիկան, այսինքն՝ այդ պակտն ուղղված էր նվաճելու այլոց երկրները, ապա Նժդեհն ու իր զինակիցները համագործակցեցին Գերմանիայի հետ, որպեսզի նացիստակակն Գերմանիայի դաշնակից Թուրքիայի հարձակման դեպքում (որը պետք է լիներ Ստալինգրադում գերմանացիների հաղթանակից հետո) փրկեին արևելահայությանը թուրքական նոր ցեղասպանությունից: Այսինքն՝ Նժդեհն ու իր զինակիցները մարդկության դեմ մեծագույն հանցագործության՝ ցեղասպանությունների դեմ պայքարող հերոսներ են»,-ընդգծեց պատմաբանը։
Հետևեք մեզ Viber-ում
