«Ավիափոխադրումները «մարշրուտկայով» մարդ տեղափոխել չէ». Ավինյանը «Տարոն-Ավիայի» հեռանալու մասին

Փոխվարչապետ Տիգրան Ավինյանը՝ «Տարոն-Ավիայի»՝ Հայաստանից հեռանալու մասին հարցին ի պատասխան   ասաց, որ այս ավիաընկերությունը՝ «Տարոն-Ավիան», եվրոպական ավիացիոն կառույցներից մեկի հետ խնդիր է ունեցել. «Ես կարծում եմ, որ Հայաստանը չի կարող լինել նպաստավոր այն ընկերությունների համար, որոնք որոշակի միջազգային չափանիշներով եւ կանոններով չեն ուզում առաջնորդվել: Ավիափոխադրումները, կներեք կոպիտ արտահայտության համար, «մարշրուտկայով» մարդ տեղափոխել չէ: Եվրոպական մեր գործընկերներն են տեղեկացրել մեզ, որ ընկերությունը չափանիշներին չի համապատասխանում, թռիչքները խնդրահարույց են»: Ավինյանի փոխանցմամբ՝ ավիաընկերությունը համալիր փորձաքննություն է անցել, արդյունքները բավարար չեն եղել եվրոպական այդ կառույցի համար. «Ընկերությանը ժամանակ տրվել է, որպեսզի փոփոխություններ կատարի, բայց որոշել է՝ նպատակահարմար չէ փոփոխություններ անել, նպատակահարմար էր թռնել Աֆրիկա»: Փոխվարչապետի խոսքով՝ կառավարությունը բոլոր ուղղություններով, որակական առումով, խստացնում է պահանջները. «Ցավալի է, որ հայկական ընկերությունը ստիպված է դուրս գալ շուկայից, բայց եթե մենք խոսում ենք թռիչքային անվտանգության մասին, դա պետք է լինի մեր գերակայությունը եւ առաջնահերթությունը, այստեղ զիջելու տեղ չունենք: Սա է լինելու քաղաքականությունը բոլոր ոլորտներում: Հայկական ընկերություններին մենք փորձում ենք աջակցել տարբեր միջոցներով, բայց պետք է հասկանանք՝ հին մեթոդներով, եւ հին ձեւերով, հին տրամաբանությամբ, հին որակով մենք չենք կարող առաջնորդվել, չենք կարող աշխատել»: