Նիկոլ «դզվի», թե չէ վերջդ վատ է լինելու.Իսրայել Հակոբկոխյան (video)

Երբ տեսնում եմ՝ ովքեր են գալիս իշխանության, ինձ համար պարզ է, որ այդ մարդիկ չեն գալիս հանուն ժողովրդի, իրենք իրենց համար են ամեն ինչ անում։ Նիկոլ Փաշինյանը ժամանակին Լևոն Տեր-Պետրոսյանի մակլավիկն էր ու լավ է սովորել նրա ստերը ու հիմա էլ ինքն է խաբում ժողովրդին: Անժելա Թովմասյանի՝ «Արմնյուզ» ՀԸ հեռարձակվող հեղինակային «Հայելու առաջ» հաղորդաշարի ընթացքում նման կարծիք է հայտնել բռնցքամարտիկ, աշխարհի բազմակի չեմպիոն Իսրայել Հակոբկոխյանը։

Բռնցքամարտիկի խոսքով՝ ժողովրդի անունից պետք է խոսեն այն մարդիկ, ովքեր ժողովրդի, ազգի համար որևէ բան են արել։ Վերջինիս դիտարկմամբ՝ մարդիկ այնքան են ստում, որ սկսում են իրենք էլ իրենց ստերին հավատալ ու այդ ժամանակ իրենց թվում է՝ ժողովուրդն էլ է այդ ստերին հավատում։

Հարցին՝ ի՞նչ ստերի մասին է խոսքը, օրինակ՝ ի՞նչ սուտ է ասել Նիկոլ Փաշինյանը, Իսրայել Հակոբկոխյանը պատասխանել է «Հեղափոխության ժամանակ ասում էին՝ արագաչափերը պետք է հանեն, բայց հիմա ավելի շատ են տուգանվում վարորդները»։

Անդրադառնալով ծանրամարտիկ Մելինե Դալուզյանի մասին պատմող ֆիլմի շուրջ բարձրացված աղմուկին՝ Իսրայել Հակոբկոխյանը հիշեցրել է, որ այդ մարզիկի՝ տարբեր դեղեր ընդունելու պատճառով պատժվեցին նաև մեր այլ մարզիկներ։ Նա ցավով նշել է, որ այս մարզիկի մասին պատմող ֆիլմը ֆինանսավորելը տպավորություն է ստեղծում, որ Հայաստանն արժանի մարզիկներ չունի, դրա համար էլ նման խնդիր ունեցող մարդու մասին է ֆիլմ նկարում։

Իսրայել Հակոբկոխյանը դիմել է նաև Նիկոլ Փաշինյանին․ «Նիկոլ ջան, դու բազմազավակ հայր ես ու հիշի, որ ով ինչ անում է, ժամանակն իր արածը վերադարձնում է»։