Մովսես Հակոբյանի հրաժարականի լույսն ու ստվերը
ՀՀ վարչապետ Նիկոլ Փաշինյանի որոշմամբ Մովսես Հակոբյանն ազատվել է գլխավոր ռազմական տեսուչի պաշտոնից: Հակոբյանի ազատման պաշտոնական մեկնաբանությունն ուշանում է, բայց վստահաբար նրան չեն ազատել ինչ-որ հանցանք գործելու համար, այլապես հեղափոխությունից հետո չէին էլ նշանակի՝ հաշվի առնելով Մոսիի «փառահեղ» անցյալը։
Մեծ է հավանականությունը, որ նրան ապագայում նոր պաշտոնի կնշանակեն եւ որ լուծարվում է ռազմական տեսուչի ինստիտուտը ու նոր կառույց ձեւավորվում, որտեղ էլ ըստ ամենայնի կտեղափոխվի Հակոբյանը։ Իշխանության «փաստաբանների» մեկնաբանություններն արդեն իսկ որոշակիրորեն լույս են սփռում Հակոբյանի պաշտոնանկության վրա։ Պատգամավոր Անդրանիկ Քոչարյանը վստահեցնում է, որ «աշխատանքային ազատման» մասին է խոսքը, թե ինչ պետք է հասկանալ այդ ձեւակերպման տակ, հայտնի է միայն Քոչարյանին, բայց նրա հաջորդիվ մտքերից կարելի է գուշակել, թե ինչ նկատի ունի նա։
Դիտարկմանը, որ Մովսես Հակոբյանն այն պաշտոնյաներից էր, որը նախկին իշխանության հետ էր ասոցացվում, Անդրանիկ Քոչարյանն մի կարեւոր ուղղում է անում՝ նախկինի նախկին էլ է եղել. «Ընդհանրապես մեր զինվորականները ծառայություն մատուցել են բոլոր իշխանությունների ժամանակ: Ուրիշ բան, որ տարբեր ժամանակաշրջանում մեր զինվորականության նկատմամբ եղել է ուրիշ վերաբերմունք, որովհետեւ եղել է իշխանություն, որը մեր բանակին հասցրել է մեծ վնաս՝ նրանց օգտագործելով ներքաղաքական խնդիրների մեջ, ինչպիսին եղել է Մարտի 1-ը»: Այսինքն, մարդը կարող է ինչ հանցագործություններ ասես արած լինի, միայն թե մասնակցած չլինի մարտի մեկի իրադարձություններին, բայց ավելի ուշագրավ է Քոչարյանի մտքի շարունակությունը․«Ես կարող եմ ասել, որ Կամո Քոչունցն էլ, Վաչագան Ներսիսյանն էլ մեր ԶՈՒ-ում ժամանակին ծառայություններ մատուցած զինվորականներ են, նաեւ Մովսես Հակոբյանը: Վերջին հաշվով մի մոռացեք, որ Մովսես Հակոբյանը եղել է մեր լեգենդար հրամանատարներից մեկի շտաբի պետը՝ Մարտունու պաշտպանական շրջանի, որի հրամանատարը եղել է Մոնթե Մելքոնյանը… Ուրիշ բան, թե ինչ արեցին մեր զինվորականների հետ հետագայում իշխանությունները»: Հարցին՝ իր հետագիծը նայելով՝ ի՞նչ եք կարծում, կարո՞ղ էր Մովսես Հակոբյանը թաթախված լինել կոռուպցիոն կամ այլ գործարքների մեջ՝ Անդրանիկ Քոչարյանը պատասխանեց. «Ես չեմ կարող ձեր հարցին պատասխանել, ձեր հարցերը պետք է տաք այլ տեղ»:
Այսինքն՝ ի հեճուկս ակնհայտ իրողությունների, Քոչարյանը փորձում է մաքրել Հակոբյանի մեղքերը եւ ասել, որ հայրենիքին մեծ ծառայություն մատուցած գեներալներից մեկն է, սա այն պարագայում, երբ իշխանության համար կենաց-մահու խնդիր դարձած Մարտի 1-ի իրադարձություններին Հակոբյանը ՀՀ ԶՈՒ գլխավոր շտաբի պետն էր, էլ չենք խոսում պետական միջոցների նրա անծայրածիր ավարի մասին, որի վերաբերյալ մամուլում բազմաթիվ նյութեր են գրվել։ Իշխանությունը առաջնորդվում է «պոլիփետ լինի, մերոնցից լինի» սկզբունքով , մեկնաբանություններից պարզ է դառնում, որ Հակոբյանի վրա «թեմա» չկա եւ պաշտոնանկությունը սոսկ ժամանակավոր է։
Անի Սահակյան