Վարչապետը փորձեց մանիպուլյացիայի միջոցով շեղել հանրության ուշադրությունը օրենքի խախտումից, մինչդեռ պետք է շնորհակալ լիներ. ԱԺ «Լուսավոր Հայաստան» խմբակցության պատգամավոր
Վարչապետը փորձեց մանիպուլյացիայի միջոցով հանրության ուշադրությունը շեղել օրենքի խախտումից: Այս մասին Tert.am-ի հետ զրույցում ասաց ԱԺ «Լուսավոր Հայաստան» խմբակցության պատգամավոր Արկադի Խաչատրյանը` անդրադառնալով երեկ ԱԺ-ում՝ ՀՀ պետբյուջեի 2020թ.-ի նախագծի քննարկման ընթացում վարչապետի արած հայտարարությանը:
Հիշեցնենք, որ վարչապետը, դիմելով «Լուսավոր Հայաստանին», ասել էր. «Ուղիղ ասե՛ք, որ դեմ եք աշխատավարձերի և թոշակների բարձրացմանը»:
««Լուսավոր Հայաստան» խմբակցության պատգամավոր Մանե Թանդիլյանն իր ելույթի ընթացքում մատնանշեց, որ պետական բյուջեի նախագիծը ներկայացված է բյուջետային համակարգի մասին օրենքի դրույթներից մեկի խախտմամբ: Մասնավորապես, այն վերաբերում է բյուջետային կանոնների և ընթացիկ և կապիտալ ծախսերի սահմանաչափերին: Մենք ներկայացրինք մասնագիտական հիմնավորումներ, թե կոնկրետ ինչն ու ինչպես է խախտված»,-ասաց Խաչատրյանը` նշելով, թե իրենք էլ, որպես ընդդիմություն, ներկայացրել են դրույթի խախտումն ու պահանջել խմբագրել ծրագիրը:
«Մեր պահանջն իրավաչափ էր, իսկ վարչապետը, օգտվելով իր լեգիտիմության բարձր աստիճանից, կատարեց հակաքարոզչական արշավ: Նա ի՞նչ մեսիջ է տալիս, այիսնքն` ընդդիմություն, ինձ չքննադատեք, որովհետև ես լեգիտիմ եմ և ինչ կուզեմ, կանե ՞մ: Կարելի է նաև օրե ՞նք խախտել: Կամ` ընդդիմություն, ինձ չքննադատեք, որովհետև ես էլ այսպսիսի մանիպուլյացիաներով ձեզ «կխփեմ» և ձեր վարկանիշի վրա կազդե ՞մ»,-ասաց Խաչատրյանը` նշելով, թե իրենք պարզապես ցանկանում են ստեղծել քաղաքական այնպիսի մշակույթ, որում տեղ ունի հիմնավոր, կառուցողական բանավեճը, որի ընթացքում պետք է շահի երկիրը, պետականությունը:
«Ընդդիմության դերն ինչու՞մ է` որպեսզի բացթողումները մատնանշի, այլընտրանքներ մատնանշի, անընդհատ պնդի, առաջարկի լուծման իր ուղիները: Պետք է շնորհակալ լիներ կառուցողական առաջարկների և քաղաքակիրթ բանավեճի համար, ոչ թե դիմեր նման մանիպուլյատիվ քայլերի,-ասաց պատգամավորը: