Որևէ մեկին չեմ ճնշելու․ԵՊՀ ռեկտորի պաշտոնակատարը՝ գործադուլի մասին
ԵՊՀ ռեկտորի ժամանակավոր պաշտոնակատար Գեղամ Գևորգյանն այսօր պարզաբանում է տվել ԿԳՄՍՆ-ի կողմից աշխատանքային քննարկման դրված «Բարձրագույն կրթության և գիտության մասին» ՀՀ օրենքի նախագծի դեմ սկսված գործադուլի և իր սեփական դիրքորոշման մասին։
Վերջինիս խոսքով, ինքը դասադուլի առաջին իսկ օրը հանդիպել է ԵՊՀ հայ բանասիրության և պատմության ֆակուլտետների դեկանների, պրոֆեսորադասախոսական կազմի և ակտիվիստ ուսանողների հետ, քննարկել ստեղծված իրավիճակը։
Գ․Գևորգյանը նշել է, որ երեկ՝ նոյեմբերի 12-ին, կրկին եղել է Հայ բանասիրության ֆակուլտետում ու տեղեկացել, որ դասախոսները որոշել են գործադուլ կազմակերպել, ապա խնդրել է նրանց չասել, որ միանում են ուսանողներին, քանի որ դա հարիր չէ ԵՊՀ դասախոսներին, այլ հստակ ձևակերպել իրենց պահանջները։
ԵՊՀ ռեկտորի ժամանակավոր պաշտոնակատարը նշել է, որ գործադուլն ունի համապատասխան ընթացակարգ․
«Գործադուլ հայտարարելու համար պետք է դիմել արհմիությանը, արհմիությունը պետք է հայտարարի գործադուլ, պետք է ներկայացնի վեճի առարկան, իսկ վեճի առարկան չի կարող լինել համալսարանից դուրս։ Եթե վեճի առարկան գործատուի հետ կապված չէ, արդեն գործադուլ չէ, այն ուղղակի բողոքի ցույց է: Դասական իմաստով սա դասադուլ չէ, սա ուղղակի դասի չգալ է։ Սա գործադուլ չէ, սա գործի չգալ է»։
Գ․ Գևորգյանը նշել է, որ գործադուլ հայտարարած պրոֆեսորադասախոսական կազմին տեղեկացրել է՝ սա օրենքի սահմաններում կարող է ունենալ իր հետևանքները, ինչը կարելի է չկիրառել, եթե ժամանակին հետ կանգնեն։
ԵՊՀ ռեկտորի ժամանակավոր պաշտոնակատարն ասել է, որ իրականում ժամաքանակ ունենալու պայքար է ընթանում, և ավլացրել, որ ինքը ցանկանում է՝ մասնագետներն անկեղծ լինեն՝ ասելով, թե ինչի համար են պայքարում։
Խոսելով իր սեփական դիրքորոշման մասին՝ Գևորգյանն ասել է, որ շատերը սպասում են՝ երբ է ինքը ցուցարարներին ճնշելու․
«Չեմ ճնշելու։ Չսպասեք։ Որևէ մեկին չեմ ճնշելու»։
Հարցին՝ կո՞ղմ է այս նախագծին, ռեկտորի պաշտոնակատարը պատասխանել է՝ այո՛, կողմ է ազատ ընտրության հնարավորությանը։
Գեղամ Գևորգյանը խոսել է նաև այն մասին, որ որոշ ֆակուլտետներում «Հայ ժողովրդի պատմություն» կամ «Հայոց լեզու» առարկաների ժամերը պատշաճ դասավանդվելու դեպքում տվյալ մասնագիտացման համար, միգուցե, ավելանան։ Նա առաջարկել է, որ բոլոր բուհ ընդունվողները պարտադիր ընդունելության քննություն հանձնեն «Հայոց լեզու» առարկայից, ինչպես եղել է Խորհրդային Միության տարիներին:
Հիշեցնենք, որ նոյեմբերի 6-ից ԵՊՀ հայ բանասիրության և պատմության ֆակուլտետների մի շարք ուսանողներ դասադուլ են սկսել «Բարձրագույն կրթության և գիտության մասին» ՀՀ օրենքի նախագծի դեմ, ըստ որի՝ «Հայոց լեզու», «Հայ գրականություն» և «Պատմություն» առարկաները պարտադիր չեն լինելու ոչ մասնագիտական ֆակուլտետների ուսանողների համար։
Այսօր էլ Երևանի պետական համալսարանի հայ բանասիրության ֆակուլտետում տեղի է ունեցել պրոֆեսորադասախոսական կազմի ընդհանուր նիստ, որի ժամանակ քննարկվել է նախագծի դեմ գործադուլ անելու առաջարկը։ Քվեարկության արդյունքում ֆակուլտետի պրոֆեսորադասախոսական կազմի ներկայացուցիչները, բացառությամբ մի քանի դասախոսի, գործադուլ են հայտարարել՝ պահանջելով հանդիպում ԿԳՄՍ նախարար Արայիկ Հարությունյանի հետ: