Միակ մարդը, որին հաջողվեց հաղթահարել աղքատությունը սեփական գլխում, Նիկոլ Փաշինյանն է. վարկով սառնարանից մինչև 55 մլն դոլարանոց ինքնաթիռ (տեսանյութ)
tert.am-ը գրում է. Նախկինում ապառիկով լվացքի մեքենա, սառնարան գնող վարչապետ Նիկոլ Փաշինյանն այժմ «կանխիկ»՝ պետբյուջեի հաշվին շռայլ ծախսեր է անում առանձնատան վերանորոգման, նոր զրահապատ մեքենայի և նոր օդանավի ձեռք բերման համար:
Սեպտեմբերի 29-ին մամուլը հայտնեց` կառավարական ամառանոցները վերանորոգվում են. դրա համար կծախսվի 2 մլն դոլար:Ուշագրավ է, որ այս հրապարակմանը նախորդած կառավարության նիստում ընդունվել էր «Վարչապետի աշխատակազմին գումար հատկացնելու մասին» նախագիծը, որում որոշ կետեր գաղտնի էին:
Չզեկուցվող հարցի 1-ին կետից պարզ է դառնում` կառավարության պահուստային ֆոնդից վարչապետի լիազորությունների իրականացման ապահովման համար հատկացվել է 291,687,400 դրամ կամ 615,000 դոլար: Ենթադրելի է, որ հենց այս որոշմամբ էլ կառավարական ամառանոցները վերանորոգելու համար գաղտնի կերպով գումար է տրամադրվել:
Ավելի ուշ Tert.am-ի հարցմանն ի պատասխան`Կառավարությունից հայտնել էին` հարցի առնչությամբ հավելյալ տեղեկություն չենք կարող տրամադրել. այն պարունակում է պետական գաղտնիք:
Ամառանոցների վերանորոգման լուրից մի քանի օր հետո մամուլը դարձյալ գրեց` Փաշինյանն արդեն նոր մեքենա ունի՝ 2019 թվականի արտադրության Mercedes S600 W222 մոդելի: Ըստ հրապարակման՝ Նիկոլ Փաշինյանին սպասարկող նոր մեքենան պետության համար նվազագույնն արժեցել է 297 հազար դոլար:
Ավելի ուշ հայտնի դարձավ` ձեռք բերված զրահապատ մեքենան մեկը չէ, սա հաստատեց ՀՀ վարչապետի աշխատակազմի ղեկավար Էդուարդ Աղաջանյանը: Նա լրագրողների հետ զրույցում հավելյալ ինֆորմացիա չտրամադրեց, ասաց, որ իրավասու չէ նշել՝ քանի մեքենա` ինչ արժեքով: Աղաջանյանը միայն հերքեց տարածված տեղեկությունը` վարչապետի տիկնոջ համար զրահապատ մեքենա ձեռք չի բերվել:
Հասարակական դժգոհությունը հարուցեց նաև չարթերային չվերթով, մասնավոր ընկերության միջոցով Նիկոլ Փաշինյանի աշխատանքային այցը ԱՄՆ: Պարզվեց` միայն ինքնաթիռի թռիչքը կազմել էր 165 մլն դրամ կամ 380 հազար դոլար, իսկ ԱՄՆ մեկնելու ամբողջ ծախսը կազմել էր շուրջ 197 մլն դրամ:
Այս չափազանց թանկարժեք ուղևորությանը հաջորդեց ավելի թանկարժեք մեկ այլ գնում: Կառավարությունը քննարկում է նոր օդանավ ձեռք բերելու հարցը. գործող թիվ մեկ ինքնաթիռը չի կարողանում տրանսատլանտյան թռիչքներ իրականացնել: Կառավարությունը դեռևս չի տրամադրում տեղեկություն, թե ինչ ինքնաթիռ է մտադիր գնել, իսկ մամուլում լուրեր են շրջանառվում, որ նոր օդանավը կարժենա 55 մլն դոլար:
Ի դեպ, հավանաբար, նոր ինքնաթիռ գնելու որոշումը եղել է ընտանեկան: Բելգիայի Թագավորություն, Լյուքսեմբուրգի Մեծ Դքսություն, Շվեյցարիա այցերի ընթացքում Նիկոլ Փաշինյանին ուղեկցած Աննա Հակոբյանը դժգոհում էր`ամուսնու հետ շփվելու ժամանակ չի մնում. միակ հնարավորությունն այս ուղևորություններն են:
Պետության վրա թանկ է նստում ոչ միայն Նիկոլ Փաշինյանը, այլև իր ընտանիքը: Երբ Փաշինյանը դեռ վարչապետի թեկնածու էր, ԱԱԾ-ի խորհրդով թիկնապահներ են տրամադրվել նաև նրա կնոջն ու երեխաներին. նշվում էր, թե ահաբեկչության վտանգ կա:
Քննադատությունների տեղիք տվեց նաև կառավարական ուղղաթիռով Փաշինյանների ընտանիքի Արցախ մեկնելը: Հետագայում պարզեց` Փաշինյանները մեկնել էին զինվոր որդու` Աշոտ Փաշինյանի տարեդարձը տոնելու։ Սրանից հետո էր, որ Նիկոլ Փաշինյանը հայտարարեց` «Որպեսզի ուղղաթիռը չվերածվի մետաղե ջարդոնի, այն պետք է թռիչք կատարի`անգամ դատարկ»:
Փաստորեն` վարչապետը միակն է, ում հաջողվել է աղքատությունը հաղթահարել սեփական գլխում: