«Մենք ուզում ենք հենց լայնածավալ պատերազմներին պատրաստ լինել». Անդրանիկ Քոչարյան

«Չեմ ուզի մեկնաբանել: Հիմա մենք պաշտպանության նախարարության հետ ինտեսնսիվ աշխատում ենք, և թերությունները պետք է մեկս մյուսին օգնելով գտնենք, լուծենք: Իհարկե, շատ բաներ պաշտպանության նախարարությանը հասանելի են եղել: Խնդիրն այն է, թե արդյոք դրանից հետո եղած որոշումները ճիշտ են եղել, կատարվե՞լ են, թե՞ չեն կատարվել»,-ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը չի  մեկնաբանել ՀՀ պաշտպանության նախարար Դավիթ Տոնոյանի այն հայտարարությունը, թե ապրիլյան քառօրյա պատերազմի քննիչ հանձնաժողովի բերած փաստերը նորություն չեն: 

«Առաջին փուլում պետք է հասկանանք՝ բանակի կառավարելիության մակարդակն ինչպիսին է եղել, և ինչ բնույթի ու ծավալի գործողություններ են տեղի ունեցել ապրիլին:  Հանրային խորհրդի նախագահ Վազգեն Մանուկյանն այդ պատերազմին «լայնածավալ» որակումն է տվել, մինչդեռ ինքը «կվախենար» նման գնահատական տալ: Նա այդ որակումը ժամանակավրեպ է համարել՝ պնդելով, որ ՀԽ նախագահը չէր կարող նման գնահատական հնչեցնել իր տեղեկատվության սահմաններում:

Այլ հարց է, որ Վ. Մանուկյանը որպես պաշտպանության նախկին նախարար այդ գործողությունները կարող է դիտել որպես լայնածավալ, բայց մեր հակառակորդի այսօրվա սպառազինության պայմաններում լայնածավալ պատերազմը լրիվ այլ բնույթի են: Եվ մենք ուզում ենք հենց այդ լայնածավալ պատերազմներին պատրաստ լինել, որպեսզի և՛ զոհերը լինեն քիչ, և՛ մեր հաջողությունները լինեն ծանրակշիռ»,- ընդգծել է Անդրանիկ Քոչարյանը:

Եկող շաբաթ հանձնաժողով է հրավիրվելու 2 պաշտոնյա,-ասաց նա  առանց անուններ նշելու: Ըստ Ա.Քոչարյանի՝ հանձնաժողովը կաշխատի այս տարվա ընթացքում ամփոփել ի մի բերված տեղեկատվությունը: