Իշխանության թեւերն իրար են «ուտում»
![Իշխանության թեւերն իրար են «ուտում»](/timthumb.php?src=/disc/07-11-19/0232a5ad317af0dbd7c0edab3d4427d1.jpg&w=708)
Արսեն Թորոսյանի հակածխախոտային օրենքը երկար քննարկումներից հետո վերջապես ներկայացվել էր Ազգային ժողով եւ քննարկման ներկայացվել Տնտեսական հարցերի մշտական հանձնաժողովում : Օրինագծերի այս փաթեթով նախատեսվում են մի շարք սահմանափակումներ, այդ թվում՝ փակ հանրային հաստատություններում ծխելու արգելք՝ հանրային տրանսպորտում, կրթական, բժշկական եւ մշակութային հաստատություններում եւ մանկական հրապարակներում:
Օրինագծով նաեւ սահմանափակումներ են նախատեսվում ծխախոտային արտադրանքի եւ թութուն պարունակող էլեկտրոնային սարքերի գովազդի համար, ինչպես նաեւ որոշվում են այն հանրային վայրերը, որտեղ ծխելու դեմ արգելք կսահմանվի: Օրինագծով նախատեսվում է նաեւ կանոնակարգել ծխախոտի արտադրանքի եւ ծխախոտ պարունակող էլեկտրոնային սարքերի վաճառքի եւ տեղաշարժի գործընթացը։
Արսեն Թորոսյանն ասաց, որ օրենսդրական այս նախաձեռնության խնդիրը թույլ չտալն է, որպեսզի ավելանա ծխող քաղաքացիների թիվը եւ օգնել հրաժարվել այդ վնասակար սովորությունից։
Ենթադրվում էր, որ նախարարի հակածխախոտային նախաձեռնությունն առաջինը ծափերով կընդուներ ԱԺ առողջապահության հանձնաժողովը, սակայն քննարկման ընթացքում պարզվեց, որ գլխավոր քննադատը նույն հանձնաժողովի նախագահ Նարեկ Զեյնալյանն է: Նա ասաց, որ հանձնաժողովն ընդհանուր առմամբ դրական է գնահատում գաղափարը, բայց բազմաթիվ հակասական դրույթներ է առանձնացրել, Զեյնալյանը նպատակահարմար չէր գտնում էլեկտրոնային ծխախոտների արգելքը եւ ուսումնասիրություններ էր ներկայացնում, որ դրանք վտանգավոր չէն:
Արսեն Թորոսյանն ու իր տեղակալն էլ հակառակն էին պնդում, ասելով, որ այդ հոդվածներն, ըստ ամենայնի, պատվիրված են եւ ֆինանսավորումն իրականացվել է ծխախոտ արտադրող ընկերությունների կողմից:
Նախարարն ասում էր, որ իր համար տարօրինակ է, որ էլեկտրոնային ծխախոտների համար պայքարում է առողջապահության հանձնաժողովի նախագահը, եթե դա անեին այդ սարքերի ներկրմամբ կամ արտադրությամբ զբաղվողներն, ինքն, անշուշտ, կհասկանար:
Արսեն Թորոսյանի նախագծի դեմ արտահայտվողները վստահեցնում էին, որ եթե արգելվի եւ սովորական ծխախոտը եւ էլեկտրոնայինները, ապա հասարակությանը կդրդեն թմրամիջոցների օգտագործման, դա է վկայում մի շարք պետությունների փորձը: Մի քանի ժամ տեւած քննարկման ընթացքում Թորոսյանն ու Զեյնալյանը իրար չէին զիջում , փոխադարձ մեղադրանքների, ակնարկների պակաս չէր զգացվում: Վերջում որոշեցին նախագծի քվեարկությունը երկու ամսով հետաձգել:
Մամուլում բազում հրապարակումներ են եղել Թորոսյան-Զեյնալյան հակամարտությունների մասին, ըստ այդմ Զեյնալյանը աչք ունի նախարարի աթոռի վրա եւ իր էլիտար հովանավոր Արարատ Միրզոյանի միջոցով ցանկանում է նվաճել նախարարի պաշտոնը: Արարատ Միրզոյանը Զեյնալյանի քավորն է: Գրեթե միշտ առողջապահության նախարարության ներկայացրած նախագծերը Զեյնալյանի կողմից կոշտ քննադատության են ենթարկվում, այսօրվա նախագիծը բացառություն չէր:
Սա նշանակում է, որ Արարատ Միրզոյանը քաղաքական ավելի մեծ ամբիցիաներ ունի ու պատգամավորների միջոցով պայքարում է կառավարության դեմ:
Անի Սահակյան