Նիկոլ Փաշինյանի «քինդեր սյուրպրիզն» ու գերսիրելին. նա գնալով ավելի քիչ հարկ է վճարում
ՀՀ պետական եկամուտների կոմիտեն հրապարակել է 2019 թվականի երրորդ եռամսյակի Հայաստանի 1000 խոշոր հարկատուների ցանկը:
Խոշոր հարկատուները հունվար-սեպտեմբեր ամիսներին պետբյուջե են վճարել 764 մլրդ 558 մլն դրամի հարկեր եւ տուրքեր՝ նախորդ տարվա նույն ժամանակահատվածի 673 մլրդ 788 մլն դրամի դիմաց: Այսինքն` խոշոր հարկատուների 2019-ի երրորդ եռամսյակում նախորդ տարվա նույն ժամանակահատվածի համեմատ ավել են վճարել շուրջ 90 մլրդ 769 մլն դրամով կամ՝ 13.47%-ով :
Խոշոր հարկատուների ցուցակը գլխավորում է «Զանգեզուրի պղնձամոլիբդենային կոմբինատ»-ը վճարած 40 մլրդ 594 մլն դրամ հարկերով: Նախորդ տարի նույն ժամանակահատվածում կոմբինատը վճարել էր 32 մլրդ 797 մլն դրամ հարկ, հետևաբոր հարկային աճը կազմել է մոտ 24 տոկոս` 7 մլրդ 796 մլն դրամ:
Երկրորդ խոշոր հարկատուն Վարդանյանների ընտանիքին պատկանող «Գրանդ տոբակո» ընկերությունն է՝ վճարած 40 մլրդ 277 մլն դրամ հարկերով: Նախորդ տարվա նույն ժամանակահատվածում «Գրանդ տոբակո»-ն վճարել էր 27 մլրդ 696 մլն դրամ և գրավում էր խոշորների ցուցակի 3-րդ հորիզոնականը: Ընկերության վճարած հարկերն աճել են 12 մլրդ 581 մլն դրամով կամ 45 տոկոսով:Փաստորեն հետհեղափոխական Հայաստանում Վարդանյանների գործերը շատ լավ են` ընկերությունը գրեթե ամեն եռամսյակ հարկային աճ է ցույց տալիս:
Երրորդ խոշոր հարկատուն՝ «Գազպրոմ Արմենիա» ընկերությունն է, որը 2019-ի հունվար-սեպտեմբեր ամիսներին վճարել է 33 մլրդ 624 մլն դրամ հարկ: Նախորդ տարի նույն ժամանակահատվածում ընկերությունը վճարել էր 30 մլրդ 372 մլն դրամ. այսինքն՝ «Գազպրոմ Արմենիա»-ի վճարած հարկերն աճել են 3 մլրդ 252 մլն դրամով կամ 11 տոկոսով:
Խոշոր հարկատուների չորրորդ հորիզոնականում դարձյալ Վարդանյանների ընտանիքին պատկանող «Ինտերնեյշնլ Մասիս Տաբակ» ընկերությունն է` վճարած 13 մլրդ 362 մլն դրամով: Նույն ընկերությունը նախորդ տարի վճարել էր 9 մլրդ 302 մլն դրամ: Այսինքն` ընկերության վճարած հարկերն աճել են 4 մլրդ 59 մլն դրամով կամ 43.64 տոկոսով: Սա խոշորների առաջին տասնյակի ամենամեծ հարկային թռիչքն է:
Հինգերորդ խոշոր հարկատուն «Գեոպրոմայնինգ գոլդ» ընկերությունն է վճարած 12 մլրդ 524 մլն դրամ հարկերով: 2018-ի նույն ժամանակահատվածում ընկերությունը վճարել էր 12 մլրդ 363 մլն դրամ հարկ: 2019-ի առաջին կիսամյակում 2018-ի համեմատ ընկերության վճարած հարկերն աճել են 160 մլն 409 հազար դրամով կամ 1.3 տոկոսով:
6-րդ խոշոր հարկատուն գործարար Բարսեղ Բեգլարյանին պատկանող «Ֆլեշ» ընկերությունն է՝ վճարած 10 մլրդ 750 մլն դրամ հարկերով: Նախորդ տարվա նույն ժամանակահատվածում ընկերությունը վճարել էր 8 մլրդ 674 մլն 592 հազար դրամ հարկ: «Ֆլեշ» ընկերության վճարած հարկերն աճել են 2 մլրդ 76 մլն դրամով կամ 24 տոկոսով:
«Հայաստանի էլեկտրական ցանցեր» ընկերությունը 7-րդ խոշոր հարկատուն է՝ վճարած 10 մլրդ 537 մլն հարկերով: 2018-ի նույն ժամանակահատվածում ընկերությունը վճարել էր 9 մլրդ 866 մլն դրամ հարկ: Ստացվում է, որ ՀԷՑ-ի վճարած հարկերը նույնպես աճել են՝ 671 մլն դրամով կամ 6.8 տոկոսով:
8-րդ խոշոր հարկատուն «Ֆիլիպ Մորրիս Արմենիա» ընկերությունն է՝ 9 մլրդ 701 մլն դրամ հարկերով, նախորդ տարվա 10 մլրդ 102 մլն դրամի դիմաց: Ստացվում է, որ ընկերության վճարած հարկերը պակասել է շուրջ 400 մլն դրամով կամ 3.96 տոկոսով:
9-րդ խոշոր հարկատուն «Ջեյ Թի Այ Արմենիա» ընկերությունն է վճարած 9 մլրդ 263 մլն դրամ հարկերով: Նախորդ տարվա նույն ժամանակահատվածում ընկերությունը վճարել էր 8 մլրդ 748 մլն դրամ հարկ. այս ընկերության վճարած հարկերն աճել են 515 մլն դրամով կամ 6 տոկոսով:
10-րդ խոշոր հարկատուն «Սիփիես Օիլ» ընկերությունն է վճարած 9 մլրդ 103 մլն 801 հազար դրամ հարկերով` նախորդ տարվա 13 մլրդ 175 մլն դրամի փոխարեն:
Ամենացնցող նորությունը սակայն խոշոր հարկատուների տասնյակում գործարար Սամվել Ալեքսանյանին պատկանող ընկերությունների բացակայությունն է: Նրան պատկանող «Ալեքս էնդ հոլդինգ» ընկերությունը վճարել է ընդամենը 4 մլրդ 551 մլն դրամ հարկ` գրավելով խոշորների ցուցակի ընդամենը 24-րդ հորիզոնականը, այն դեպքում երբ այս ընկերությունը նախկին իշխանությունների օրոք մշտապես ներկայացված է եղել առաջին տասնյակում: Այսպիսով` Ալեքսանյանը դառնում է հեղափոխական Նիկոլ Փաշինյանի քինդեր-սյուրպրիզն ու գերսիրելին: Մարդու բիզնեսները ծաղկում են, հարկերը` քչանում:
Հայկ Դավթյան