ChainPoint19 բլոկչեյն միջազգային համաժողովով Երևանում մեկնարկեց «Ավրորա» ֆորումը
ChainPoint19 բլոկչեյն միջազգային համաժողովը հայ և օտարազգի բազմաթիվ մասնագետների տեղեկատվական տեխնոլոգիաների և նորարարությունների կիրառման օգուտները քննարկելու և դրանց շուրջ տեսակետներ զարգացնելու հնարավորություն ընձեռեց:
Համաժողովը մեկնարկեց հոկտեմբերի 14-ին «Ավրորա» ֆորումի շրջանակում:
Բացմանը ՀՀ էկոնոմիկայի նախարար Տիգրան Խաչատրյանն ասաց, որ համաժողովի ընթացքում նախատեսվող քննարկումները նվիրված են ապագայի տեխնոլոգիաներին:
«Նման հեղինակավոր միջոցառման անցկացումը կարևոր է այն նորարարական կազմակերպությունների համար, որոնք Հայաստանում հետևում են աշխարհի զարգացումներին և ձեռք են բերում հնարավորություն իրենց տեսակետներն ու կարողությունները ներկա պահանջներին համապատասխանեցնելու միջոցով դառնալ համաշխարհային զարգացման մի մասը»,- նշեց նա:
ChainPoint19 բլոկչեյնի միջազգային համաժողովը հյուրընկալել է Nooor բլոկչեյնի հայկական ասոցիացիան: Այն հավակնում է լինել Կովկասում անցկացվող բլոկչեյնի ամենամեծ միջազգային համաժողովը, որը միավորում է բլոկչեյնի գլոբալ առաջնորդներին:
«Ավրորա» ֆորումն իր տեսակով առաջինն է տարածաշրջանում: Մեկ շաբաթվա ընթացքում ֆորումը միավորելու է աշխարհի առաջատար մասնագետներին սոցիալական, կրթական, մարդասիրական և գիտատեխնիկական նորարարության ոլորտներից, որոնք կկիսվեն իրենց փորձով, մտքերով ու կփորձեն հանդես գալ աշխարհն ավելի լավը դարձնող գաղափարներով: «Ավրորա» ֆորումն ունի 157 Բարի կամքի դեսպան աշխարհի 39 երկրից, որոնք ներկայացնում են 17 ոլորտ: