Ադրբեջանն առաջարկում է Ասկերովին և Գուլիևին փոխանակել Կարեն Ղազարյանի և Արայիկ Ղազարյանի հետ

Ադրբեջանն առաջարկել է Հայաստանին փոխանակել գերիներին ու պատանդներին «բոլորը բոլորի դիմաց» սկզբունքով, և ապագայում վերադարձնել գերիներին ու պատանդներին, ինչպես նաև զոհվածների դիերը երեք օրվա ընթացքում՝ միջազգային կազմակերպությունների միջնորդությամբ․ այս մասին հայտնում է ադրբեջանական Turan գործակալությունը՝ վկայակոչելով երկրի՝ Գերիների, պատանդների և անհայտ կորածների գործերով պետական հանձնաժողովի հաղորդագրությունը, որը տարածվել է սեպտեմբերի 18-ին։

Նշվում է, որ հիշյալ առաջարկը ադրբեջանական կողմն արել էր դեռ 2016թ․ ապրիլին։

Ադրբեջանական կողմը պնդում է, որ վերջին օրերին հայկական կողմը հաղորդագրություններ է տարածում, որ Ադրբեջանը պատրաստ չէ փոխանակել Արցախում ազատազրկման մեջ գտնվող դիվերսանտներ Շահբազ Գուլիևին եւ Դիլհամ Ասկերովին Ադրբեջանում դատապարտված Կարեն Ղազարյանի և դեռևս չպարզված հանգամանքներում Ադրբեջանի տարածքում հայտնված՝ Արցախի Պաշտպանության բանակի զինծառայող Արայիկ Ղազարյանի հետ։

ՀՀ պաշտպանության նախարարի մամուլի խոսնակ Արծրուն Հովհաննիսյանը, մինչդեռ, իրավաչափ չի համարում Արցախի Հանրապետության Շուշի քաղաքի «Շուշի քրեակատարողական հիմնարկ»-ում գտնվող ադրբեջանցի երկու դիվերսանտի փոխանակումը Ադրբեջանում գտնվող ՀՀ քաղաքացիների և զինծառայողների հետ․ Հովհաննիսյանն այս մասին ասել է լրագրողների հետ զրույցում՝ անդրադառնալով հարցին՝ փոխանակման նմանատիպ հնարավորություն կա՞, թե ոչ:

«Գուցե և հնարավոր է, սակայն այդ քայլն իրավաչափ չէ, քանի որ ադրբեջանական կողմից եղել են ահաբեկիչներ, ովքեր սպանել են երեխաների, իսկ մեր կողմից հակառակորդի տարածքում հայտնված անձինք մոլորվածներ են: Կա ևս մեկ հանգամանք՝ պետք է ճշտել` ադրբեջանական կողմը համաձա՞յն է, թե` ոչ կամ նրանք ցանկանո՞ւմ են այդ երկուսի դիմաց բոլորին ետ տալ»,- նշել է Հովհաննիսյանը:

Ադրբեջանի քաղաքացիներ Դիլհամ Ասկերովը և Շահբազ Գուլիևը, որոնք ունենալով զենք ու զինամթերք, 2014թ․ հունիսի 29-ին հետախուզական գործողությունների նպատակով ապօրինաբար հատել էին ԼՂ սահմանը և ներխուժել Շահումյանի շրջանի տարածք, այժմ պահվում են Շուշիի քրեակատարողական հիմնարկում:

Արցախի ընդհանուր իրավասության առաջին ատյանի դատարանի վճռով Դիլհամ Ասկերովը դատապարտվել է ցմահ, իսկ Շահբազ Գուլիևը՝ 22 տարվա ազատազրկման:

Այս տարվա հունիսի վերջին Հայաստանի և Ադրբեջանի իշխանությունները մեկական ձերբակալվածի են փոխանակել: ՀՀ ԱԳՆ մամուլի խոսնակ Աննա Նաղդալյանը հայտնել էր, որ Հայաստանն ու Ադրբեջանը փոխանակել են 2019–ին մարտի 16-ին ՀՀ պետական սահմանն ապօրինի հատած Էլվին Արիֆ Օղլու Իբրահիմովին և 2017-ի հունիսի 20-ին անհայտ պայմաններում Ադրբեջանի տարածքում հայտնված ՀՀ քաղաքացի Զավեն Կարապետյանին։

Աղբյուրը՝ civilnet.am