Վանեցյանի հրաժարականով Փաշինյանը ի՞նչ մեսիջ ուղարկեց Վաշինգտոնին ու Անկարային

Ինչպես հայտնի է ԱԱԾ-ի պետի պաշտոնը ավանդաբար համարվել է ռուսական տիրույթի գործչի պաշտոն: Պատճառը հասկանալի է. անվտանգության շատ հարցերում հայաստանյան կառույցին աջակցում են իրենց մոսկովյան կոլեգաները: Քանզի մեր երկրում անվտանգության խնդիրները պայմանավորված են ոչ միայն Ադրբեջանի, այլև Թուրքիայի գործոնով: Այդ հսկայածավալ աշխատանքն այսօր Հայաստանը միայնակ ունակ չէ իրականացնել:

Հասկանալի պատճառով այս կառույցը նյարդայնացնում է Վաշինգտոնին և նրա տարածաշրջանի գլխավոր օպերատոր Թուրքիային: Եվ իզուր չէ, որ օրինակ նույն Վրաստանում դեռ Շևարնաձեի ժամանակներից այդ երկրի ԱԱԾ-ի պետին՝ Գեորգաձեին հեռացնելուց հետո ամերիկացիների և թուրքերի պնդմամբ այդ պաշտոնում նշանակվում էին բացառապես ռուսական տիրույթից դուրս գործիչներ: Դրա դիմաց վրացական ԱԱԾ-ն, բնականաբար, համապատասխան օգնություն էր ստանում ամերիկյան CIA-ից և թուրքական MIT-ից:

Սաակաշվիլիի կառավարման ժամանակներից սկսած այդ կառույցը ամբողջովին ինտեգրվեց ամերիկաթուրքական հետախուզական համակարգի մեջ:

Այսօր արդեն այդ նույն պահանջը դրված է Փաշինյանի առջև: Ֆորմալ առումով Հայաստանում այդ պահանջը դրվում է վերը նշված դրսի շրջանակների հայաստանյան կառույցների միջոցով՝ սորոսականների ու «սասնածռականների» կողմից, սակայն տևական ժամանակ Փաշինյանը մերժում էր ամերիկացիների ու թուրքերի պահանջը: Հասկանալի պատճառով Փաշինյանը ոչ միայն չէր ուզում փչացնել իր հարաբերությունները Մոսկվայի հետ, այլև զգուշանում էր ամերաթուրքական այդ տանդեմից:

Սակայն վերջին ժամանակների ընթացքում Փաշինյանի վարկանիշը կտրուկ անկում է ապրել, և բացի այդ նա այսօր կանգնած է Ամուլսարի թնջուկի լուծման առջև: Փաշինյանի այս դժվարին վիճակն էլ ամերիկյան շրջանակները փորձում են քաղաքականապես կապիտալիզացնել: Մի կողմից պաշտոնական մակարդակով Փաշինյանին նախազգուշացնում են, որ եթե նա Ամուլսարի նախագիծը կրկին չբացի, ապա Վաշինգտոնը նրան «դուրս կգրի որպես գործիչ»: Մյուս կողմից՝ զգալով որ Փաշինյանի դիրքերը թուլացել են, նույն ամերիկայն շրջանակները Ամուլսարի թեման սկսել են շահարկել նաև հակառակ կողմով: Սորոսականների և «ծռերի» միջոցով նրանք ճնշում են գործադրում Փաշինյանի վրա՝ սպառնալով նոր «Գունավոր հեղափոխություն» իրականացնել իր դեմ:

Ամերիկյան այդ գործելու երկակի մոդելի մասին մենք կներկայացնենք մեկ ուրիշ անգամ: Այսօր փաստենք, որ Ամուլսարի հարցում ամերիկացիները Փաշինյանին թակարդի մեջ են գցել: Մի կողմից պաշտոնական մասով սպառնում պատժամիջոցներ կիրառել Փաշինյանի դեմ, եթե հանքը չբացվի, մյուս կողմից իրենց ոչ պաշտոնական խողովակների միջոցով սպառնում են նույն Փաշինյանին «Գունավոր հեղափոխությամբ», եթե հանքը բացվի:

Փաշինյանը իր այս ծանր վիճակը լիովին գիտակցում է և փորձում է կուլիսային բանակցությունների մեջ մտնել ամերիկացիների հետ:

Թե ինչպես կավարտվի այդ քաղաքական առևտուրը« դեռ հայտնի չէ, սակայն արդեն երևում են տեսանելի արդյունքներ: Այն է՝ Վանեցյանը հեռացվեց իր պաշտոնից և նույնը սպասվում է նաև Օսիպյանի մասով: Հաջորդը լինելու է ՊՆ-ն: Ամերիկացիները պահանջում են նաև զիջումներ Ղարաբաղի մասով, ՀԱՊԿ-ից դուրս գալու գործընթաց սկսել և ռուսական ռազմաբազայի դուրսբերման քայլեր կատարել: Հասկանալի է, որ Փաշինյանը միանգամից բոլոր պահանջները չի կարող կատարել:

Իսկ թե ինչպիսին կլինեն նրա հաջորդ քայլերը կիմանանք ոչ շատ հեռու ապագայում:

Պարզ է մեկ բան, որ Փաշինյանի մնալը իշխանության մեջ լրջագույն սպառնալիք է դառնալու ոչ միայն Ղարաբաղի, այլև Հայաստանի պետականության համար:

Սա է իրականությունը:

zham.am