Քոչարյանի գործը` մի կրակոցով մի քանի նապաստակ
Դատարանի կողմից երկրորդ նախագահ Ռոբերտ Քոչարյանի ազատ արձակման հայցի մերժումը մի կողմից ապահովում է հանրային տեսարաններ, մյուս կողմից օրակարգային որոշ հարցերից առժամանակ ուշադրություն է շեղում:
ՀՀ երկրորդ նախագահ Ռոբերտ Քոչարյանի փաստաբանները վերաքննիչ բողոք են ներկայացնելու Երևան քաղաքի ընդհանուր իրավասության դատարանի Շենգավիթի նստավայրում դատավոր Աննա Դանիբեկյանի կողմից սեպտեմբերի 17-ին կայացրած որոշման դեմ, համաձայն որի` մերժվեց Քոչարյանի նկատմամբ խափանման միջոց կալանքը վերացնելու և քրեական հետապնդումը դադարեցնելու վերաբերյալ պաշտպանների միջնորդությունը:
Սահմանադրական դատարանի որոշումից հետո Ռոբերտ Քոչարյանի` կալանքից ազատելու հարցը միանշանակ անցնելու է դատական ատյանների բոլոր աստիճաններով, և բացառված չէ, որ վերաքննիչ դատարանը, ինչպես դա եղավ նախորդ անգամ, կկայացնի ազատ արձակման որոշում: Մյուս կողմից մինչև ԵԱՏՄ խորհրդի Երևանում նախատեսված առաջիկա նիստը, հոկտեմբերի 1-ը այս հարցը տեխնիկապես պետք է լուծված լինի, և դա առաջին հերթին ձեռնտու է օրվա իշխանությանը:
Նիկոլ Փաշինյանն ու նրա թիմը այս անգամ առերևույթ որևէ կերպ Քոչարյանի դատական գործին միջամտելու անմիջական քայլեր ցույց չտվեցին: Բայց դատարանի` դրսում ծավալված հակաքոչարյանական ակցիան շատ լավ ուղղորդված և կազմակերպված էր, որը հոգեբանական և հանրային ճնշում էր դատարանի նկատմամբ: Շատ ավելի հզոր ճնշում էր նախօրեին իշխող քաղաքական ուժի որոշումը` ՍԴ նախագահի լիազորությունների կասեցման գործընթաց սկսելու վերաբերյալ: Քոչարյանի փաստաբաններն արդեն հայտարարել են, որ Երևան քաղաքի ընդհանուր իրավասության դատարանի Շենգավիթի նստավայրում դատավոր Աննա Դանիբեկյանի կողմից կայացված որոշման պատճառ են հանդիսացել հանրապետության բարձրագույն պաշտոնատար անձանց կողմից կատարված հայտարարությունները և ուղիղ սպառնալիքները Սահմանադրական դատարանի հասցեին:
Փաստաբանական խմբի ներկայացուցիչ Հայկ Ալումյանը նշել է, որ Սահմանադրական դատարանի հասցեին ուղղված սպառնալիքներն իրենց էությամբ նաև դատարանին ուղղորդող հայտարարություններ են եղել, որովհետև իշխող ուժի վերնախավը հայտարարեց, թե ՍԴ որոշումն ապօրինի ու անօրինական է: Այսինքն` դրանով իշխող քաղաքական ուժը մեսիջ ուղարկեց գործը քննող դատավորին, որ ազատ արձակման որոշումը դիտարկվելու է ապօրինի:
Ստեղծված իրավիճակը իշխանության համար նպաստավոր է մի քանի առումով. այս փուլում Քոչարյանի գործի նման ընթացքը կարող է առիթ հանդիսանալ` շեղելու հանրային ուշադրությունը Ամուլսարի հարցից: Բացի այդ` ստեղծված իրավիճակը` որպես քաղաքական առիթ, կօգտագործվի նաև լուծելու Սահմանադրական դատարանի նախագահի հարցը, որը Փաշինյանի իշխանության վաղեմի երազանքն է: Այսինքն` իշխանությունը փորձում է մի կրակոցով միանգամից մի քանի նապաստակ խփել` Քոչարյանի ազատ արձակմամբ լուծելով սեփական քաղաքական օրակարգում ծանրացած և հեղափոխության երկրորդ էտապին խանգարող մի քանի կարևոր հարցեր:
Հայկ Դավթյան