Ռուսաստանաբնակ գործարար Ալբերտ Ավդոլյանը կդառնա Յակուտսկի ջերմաէներգետիկ ընկերության նոր բաժնետերը

Ռուսական «А-Проперти» ընկերությունը, որի սեփականատերը Yota հեռահաղորդակցության օպերատորի հիմնադիր Ալբերտ Ավդոլյանն է, պարտքերի դիմաց ստանալու է Յակուտսկի ջերմաէներգետիկ ընկերությունը (ПАО ЯТЭК)։ Փոխանցում է Tert.am-ը:

Հաղորդման համաձայն՝ ЯТЭК-ը գործարար Զիյավուդին Մագոմեդովի վերջին խոշոր ակտիվն էր։ 2018թ․ Մագոմեդովը ձերբակալվել է՝ հանցավոր խմբավորման կազմակերպման մեղադրանքով։

««А-Проперти» ընկերությունը դառնում է ЯТЭК-ի նոր բաժնետերը։ Մագոմեդովը տվել է իր համաձայնությունը իրեն պատկանող բաժնեմասի օտարման համար»,- լրատվամիջոցին հայտնել են երկու կողմերին մոտ աղբյուրները:

Նշվում է, որ «А-Проперти»-ն «գնել» է 2018թ․ վերջից սկսած ЯТЭК-ի՝ ռուսական բանկերին ունեցած պարտքերը, որոնք կազմել են ընդհանուր 11,5 մլրդ ռուբլի։ Հաղորդման համաձայն՝ Ալբերտ Ավդոլյանի և նրա բիզնես-գործընկեր Սերգեյ Ադոնևի կառույցները պլանավորում են Յակուտիայում կառուցել արդյունաբերական կլաստեր, որում կներառվեն Յակուտսկի ջերմաէներգետիկ ընկերությունը, Օգոջայի ածխային նախագիծը, Վերա նավահանգիստը։