Աննախադեպ է. գրանցված աշխատողների թիվը անցել է 600 հազարը. Նիկոլ Փաշինյան

 «2019 թվականի հունվար-հունիս ամիսներին Զինծառայողների ապահովագրության հիմնադրամին իրականացրած պարտադիր վճարումները 2018 թվականի նույն ժամանակահատվածի համեմատ ցուցանիշը գերազանցել են 347.8 մլն դրամով կամ 9.6 տոկոսով Այս աճը պայմանավորված է վարձու աշխատողների թվաքանակի ավելացմամբ», - Ազգային ժողովում կառավարության հետ հարցուպատասխանի ժամանակ հայտարարեց ՀՀ վարչապետ Նիկոլ Փաշինյանը։

Շարունակելով ներկայացնել վիճակագրությունը, վարչապետը տեղեկացրեց, որ 2019 թվականի հունվար-հունիս ամիսներին պաշտոնապես գրանցված գործազուրկների թիվը նախորդ տարվա նույն ժամանակահատվածի նկատմամբ նվազել է 6.4 տոկոսով։

«Հայաստանի Հանրապետության պատմության մեջ առաջին անգամ ՀՀ-ում գրանցած աշխատողների թիվը գերազանցել է 600 հազարը և հուլիսի 31-ի տվյալի համաձայն, այդ թիվը հասել է 604 հազարի։ Նախորդ տարվա մայիսից ի վեր, պաշտոնապես գրանցված աշխատողների թիվը ավելացել է 63 հազարով։ Սրանք այն տվյալներն են, որոնք գործատուները ներկայացնում են Պետական եկամուտների կոմիտե», -հայտարարեց Փաշինյանը՝ պատասխանելով ԱԺ պատգամավոր Տիգրան Ուրիխանյանի հարցին։