«Լսի՛ր, դու այն ժամանա՞կ էիր ապուշ, թե՞ հիմա, այն ժամանա՞կ էիր ստախոս, թե՞ հիմա». Պարույր Հայրիկյան
ԱԻՄ առաջնորդ Պարույր Հայրիկյանը այսօր Հայելի ակումբում հարցին, թե ՀՀ այսօրվա իշխանությունները որքանո՞վ են հավատարիմ հռչակագրին, պատասխանեց. «Սահմանադրության հռչակագրի հատվածում ասված է, որ երկիրը պատկանում է ժողովրդին: Որպեսզի կարողանաս հռչակագրի այդ դրույթներն իրականացնել, պետք է այնպիսի պետական համակարգ ունենաս, որ իշխանավորներն իսկապես ներկայացնեն ժողովրդին, բայց մենք գիտենք, որ այսօրվա իշխանությունները Սերժ Սարգսյանի հագով կարված Սահմանադրությունը վերցրին իրենց վրա: Հիմա ամեն տեսակի բարեկրթություն մի կողմ թողած, պիտի ասես՝ լսի՛ր, դու այն ժամանա՞կ էիր ապուշ, թե՞ հիմա, այն ժամանա՞կ էիր ստախոս, թե՞ հիմա։ Դու այն ժամանակ ասում էիր՝ այս օրենսգրքով չի կարող ձևավորվել լեգիտիմ խորհրդարան։ Հիմա ասում ես՝ մենք ժողովրդի կողմից ընտրված խորհրդարան ունենք, գոնե մի հատ ասա ներողություն, այն ժամանակ ես դեղս չէի խմել, օրինակի համար, այն ժամանակ ես վատառողջ էի, գիտակցական մակարդակս ցածր էր, այն ժամանակ խաբեբա էի, դրա համար ձեզ ասում էի՝ դրանով չի կարող լինել, բայց քանի որ հիմա եկել եմ իշխանության, ուրեմն կարելի է դրանով ընտրվել»: