Լրացուցիչ խումբ է ուղարկվել Սևան
«Մեր նախկին հայտարարության մեջ հերքելու ոչինչ չկա, որովհետև կոնկրետ Մարտունու և Վարդենիկի հատվածներում փորձաքննության արդյունքները այդպես են ցույց տվել»,- այս մասին «Հրապարակի» հետ զրույցում, պատասխանելով հարցին, թե առողջապահության նախարարությունը պատրաստվո՞ւմ է հերքել օրեր առաջ արված հայտարարությունը, պատասխանեց առողջապահության նախարարի մամուլի քարտուղար Ալինա Նիկողոսյանը։
Հիշեցնենք, որ այսօր Սևանա լճի ափամերձ տարածքների ձեռնարկատերերը փակել էին Երևան-Սևան մայրուղին՝ կառավարությունից պահանջելով հերքել օրեր առաջ արված հայտարարությունը, որում նշվում էր, թե Սևանա լճի առանձին հատվածներում լողալը վտանգավոր է։ Ձեռնարկատերերը պնդում են, որ այդ հայտարարությունից հետո մարդիկ չեն այցելում իրենց ձեռնարկություններ։ Նիկողոսյանը նաև տեղեկացրեց, որ նախարարությունը լրացուցիչ խումբ է ուղարկել Սևան․
«Մենք այսօր լրացուցիչ խումբ ենք ուղարկել Սևան, այնտեղ լրացուցիչ փորձաքննություն է անցկացվելու բոլոր ափերով, որպեսզի հասկանանք, թե որ մասերում, որ հատվածներում է վտանգը, քանի որ այդ ջրիմուռները տեղաշարժվելու հատկություն ունեն։ Մենք մեր հայտարարության մեջ էլ կոնկրետ նշել էինք հատվածները, այժմ ուզում ենք հասկանալ, թե ինչ-որ բան փոխվե՞լ է մեր հայտարարությունից հետո»։
Հետևեք մեզ Viber-ում
