Կին վարորդ. «Արգելակման փոխարեն շփոթվել, գազի սեղմակն եմ սեղմել»

Երեկ՝ հուլիսի 11-ին, վրաերթ է տեղի ունեցել Երևանում: Ժաը 20:00-ի սահմաններում Երևանի բնակիչ, 34-ամյա Մարուսյա Ա.-ն իր վարած BMW մակնիշի 49 VV 009 համարանիշի ավտոմեքենայով Վազգեն Սարգսյան փողոոցում վրաերթի է ենթարկել հետիոտն, Երևանի բնակիչ, 38-ամյա Նազելի Ս.-ին:

Ինչպես հայտնում է ֆոտոլրագրող Գագիկ Շամշյանը, վրաերթի ենթարկվածը տեղափոխվել է Թիվ 1 համալսարանական հիվանդանոց, իսկ Մարուսյա Ա.-ն այնուհետև BMW–ով դուրս է եկել ճանապարհի երթևեկելի գոտուց և բախվել ծառին: Դեպքի վայր են ժամանել Երևանի ճանապարհային ոստիկանության ծառայողները: Վթարի մասին Երևանի ՃՈ օպերատիվ կառավարման կենտրոնի պատասխանատու հերթապահ Կարեն Գյուլումյանը տեղեկությունը փոխանցել է Ճանապարհային Ոստիկանության ճանապարհատրանսպորտային պատահարների գործերով հետաքննության և վարչական վարույթի իրականացման բաժանմունք, որտեղից ժամանել է հերթապահ խումբը՝ հետաքննիչ Հովհաննես Սարգսյանի գլխավորությամբ, ում կողմից փաստի առթիվ նյութեր են նախապատրաստվում:

Գ.Շամշյանի տեղեկություններով՝ վարորդ Մարուսյա Ա.ն աշխատում է Երևանում գործող ՍՊԸ-ներից մեկի տնօրեն և նա դեպքի վայրում հայտնել է, որ ինքը նկատել է փողոցն անցնող քաղաքացուն, ով եղել է, ըստ տեղեկությունների, մանկասայլակով, որտեղ երեխա է եղել, ով, բարեբախտաբար, չի տուժել, ինքը խառնվել է իրար և արգելակի փոխարեն գազի սեղմակն է սեղմել: Հետաքննիչի հանձնարարականով ավտոմեքենան տեղափոխվել է Երևանի ՃՈ պահպանվող հատուկ տարածք: