Քոչարյանին ազատ արձակած դատավորը գրագողություն է՞ արել
Աժ «Իմ քայլը» խմբակցության պատգամավոր Մխիթար Հայրապետյանը ֆեյսբուքյան իր էջում գրում է ՝
«Երեկ Հանրայինի եթերում Բարձրագույն որակավորման կոմիտեի նախագահ Սմբատ Գոգյանը, անդրադառնալով գրագողության թեմային, վերահաստատեց մամուլում տարածված այն տեղեկությունը, որ ՀՀ վերաքննիչ քրեական դատարանի դատավոր Ալեքսանդր Ազարյանն իր ատենախոսության մի հատվածն արտատպել է այլ հեղինակների աշխատություններից:
Սույն թեմայով այսօր քննարկում ունեցանք ՀՀ ԱԺ գիտության, կրթության, մշակույթի, սփյուռքի, սպորտի և երիտասարդության հարցերի մշտական հանձնաժողովի փոխնախագահ Հովհաննես Հովհաննիսյանի հետ: Հաշվի առնելով ԲՈԿ ղեկավարի կողմից արտահայտած մտահոգությունները գրագողության դեպքերի հետ կապված՝ որոշեցինք հրավիրել հանձնաժողովի արտահերթ նիստ՝ քննարկելու խնդրո առարկա հարցը և հնարավոր օրենսդրական լուծումների շրջանակներում պայքարելու գրագողության երևույթի դեմ, որն ուղղակի հարվածում է կրթության և գիտության առաջընթացին Հայաստանի Հանրապետությունում: Այդ նպատակով հնարավոր ենք համարում նաև դիմելու Բարձրագույն որակավորման կոմիտե՝ նախկին և ներկա պաշտոնյաների կողմից պաշտպանված թեկնածուական և դոկտորական ատենախոսությունների քննման ու գրագողության դեպքերի վերհանման նպատակով:
Հաշվի առնելով այն հանգամանքը, որ քաղաքակիրթ աշխարհում գրագողության մեջ մեղադրվող պաշտոնյաները անմիջապես թողնում են իրենց պաշտոնը, կարծում ենք, որ Հայաստանը ևս պետք է մասը կազմի այդ ընտանիքի, և այս առումով արտահերթ նիստը դիտարկում ենք որպես երկարատև գործընթացի սկիզբ. հետևողական ենք լինելու արատավոր այս երևույթը արմատախիլ անելու գործում»: