Մասիսի քաղաքապետին առաջադրված զանգվածային անկարգություններ կազմակերպելու մեղադրանքը վերացվել է, խուլիգանությունը կա

Մասիսի քաղաքապետ Դավիթ Համբարձումյանի փաստաբան Տիգրան Աթանեսյանը այսօր հայտարարել է, որ իր պաշտպանյալի նկատմամբ քրեական հետապնդումը 2018-ի ապրիլյան իրադարձությունների մասով Քննչական կոմիտեն վերացրել է։ Աթանեսյանի փոխանցմամբ, քրեական հետապնդումը դադարեցվել է հանցակազմի բացակայության հիմքով։

Բացի Համբարձումյանից, քրեական հետապնդումը նույն մեղադրանքով դադարեցվել է ևս երեք անձի նկատմամբ։

Քննչական կոմիտեի լրատվական ծառայության պատասխանատու Նաիրա Հարությունյանը Aysor.am-ի հարցմանն ի պատասխան տեղեկացրեց, որ զանգվածային անկարգություններ կազմակերպելու համար քրեական հետապնդումը դադարեցվել է, սակայն խուլիգանության համար առաջադրված մեղադրանքը դեռ կա։

«ՀՀ քննչական կոմիտեի Երևան քաղաքի քննչական վարչության ծանր հանցագործությունների քննության բաժնում շարունակվում է 2018 թվականի ապրիլին Երևան քաղաքում և ՀՀ մարզերում խաղաղ հավաքներ և երթեր անցկացնող մի խումբ քաղաքացիների նկատմամբ խուլիգանական դրդումներով բռնություն գործադրելու դեպքերի առթիվ հարուցված քրեական գործի նախաքննությունը: Այս պահին քրեական գործով մեղադրյալի դատավարական կարգավիճակ ունի 8 անձ:

Մասիսի քաղաքապետ Դավիթ Համբարձումյանին քրեական գործի շրջանակներում մեղադրանք էր առաջադրվել երկու հոդվածով՝ ՀՀ քրեական օրենսգրքի 225-րդ հոդվածի 2-րդ և 258-րդ հոդվածի 4-րդ մասով: Այս պահին Համբարձումյանի նկատմամբ քրեական հետապնդումը դադարեցվել է միայն 225-րդ հոդվածի 2-րդ մասով: Իսկ ահա 258-րդ հոդվածի 4-րդ մասով Դավիթ Համբարձումյանը շարունակում է մնալ մեղադրյալ», - տեղեկացրեց Հարությունյանը:

Հիշեցնենք՝ Մասիսի քաղաքապետին մեղադրանք էր առաջադրվել ՀՀ քրեական օրենսգրքի 225-րդ հոդվածի 1-ին և 2-րդ մասերով (զանգվածային անկարգություններ կազմակերպելը) և ՀՀ քրեական օրենսգրքի 258-րդ հոդվածի 4-րդ մասով (խուլիգանություն):

Սակայն երկար քննությունից հետո, երբ արդեն պետք է դատախազը հաստատեր մեղադրական եզրակացությունը՝ դատարան ուղարկելու համար, տեղի էր ունեցել անսպասելին։

Մասիսի քաղաքապետ Դավիթ Համբարձումյանի, նրա եղբոր՝ Գոռ Համբարձումյանի, փոխքաղաքապետ Կարեն Օհանյանի և ևս 8 անձի վերաբերյալ քրեական գործը դատախազությունը հետ էր Քննչական կոմիտե՝ լրացուցիչ նախաքննության, քննչական ու դատավարական գործողություններ կատարելու անհրաժեշտությամբ պայմանավորված։