35 մլն դոլար հատկացնում ենք եւ ամեն անգամ սթրեսի մեջ ենք հայտնվում ․ վարչապետ
«Որակյալ նախագծեր ներկայացնող, ասֆալտապատման որակյալ աշխատանքներ իրականացնողների խնդիրներ կան, մի լաբորատորիան ասում է՝ հարյուր տոկոս համապատասանում է, մեկը՝ չի համապատասխանում: Ընկերություններ կան, որոնք մասնագիտացված են մրցույթում հաղթելու մեջ, բայց ի վիճակի չեն այդ խնդիրները կատարել, ինչ-որ սխեմաներ գործել են, բայց անընդհատ այդ խնդիրներին ենք բախվել․
35 միլիոն դոլար հատկացնում ենք ճանապարհաշինարարությանը եւ ամեն անգամ քննարկելիս սթրեսի մեջ ենք, որ կարողանալո՞ւ ենք այդ գումարը ծախսել եւ ունենալ ճանապարհ, ամեն անգամ մեզ դուխ ենք տալիս, որ կկարողանանք: Արդյունքում «սեւ ցուցակի» ընկերությունների թիվն ավելանում է, «սպիտակ ցուցակի» ընկերությունների թիվը՝ այնքան էլ չէ»,-կառավարության այսօրվա նիստում,խոսելով ճանապարհաշինարարության մասին ,նշեց վարչապետ Նիկոլ Փաշինյանը:
Ինչ վերաբերում է մեկնաբանությանը, որ խիստ չափանիշներ են դրել եւ պահանջներին պետք է համապատասխանեն, վարչապետն արձագանքեց, որ ձգձգման պրակտիկային պետք է վերջ տալ․
«Այս թատրոնը հերիք ա, որ հետ եք տալիս նախագիծը։ Նախագիծը հետ ուղարկելիս ոչ թե ավելի է բարելավվում, այլ պարզապես մտածում են՝ ինչպես ներկայացնեն, որ անցնի»:
Տրանսպորտի եւ կապի նախարար Հակոբ Արշակյանն էլ ասաց, որ իրենք հստակ մեսիջները հղում են, ըստ իրեն՝ կհասկանան: Վարչապետը հիշեց «Կարգին հաղորդման» սկետչերից մեկը․
«Գալիս եմ այն եզրակացության, որ այդ սկետչին պետք է կարգավիճակ տալ, որ վերջում ասում է՝ շեֆ ջան, ոնց որ տենց չոտկի չէիր ասում: Սա լուրջ համակարգային պրոբլեմ է, մշակութային մակարդակի պրոբլեմ է: Երբ մեկի նախագիծը մերժում ես, մտածում է՝ տենաս ինչի չունի այս նախարարը ինձ հետ, ինչի չի ուզում իրար հետ լավ լինենք, սակայն չի մտածում, որ խաբեություն չկա, պարզապես նախագիծը իրոք անորակ է»,- ասաց վարչապետը:
Հետևեք մեզ Viber-ում
