Ինչն է ահաբեկել Նիկոլ Փաշինյանին.հակահեղափոխության սարսափը
Եթե որոշ ուժեր ունեն Արցախը հակահեղափոխության օջախ դարձնելու ցանկություն, ապա Արցախի հանրությունը կդարձնի այն հեղափոխության օջախ: Վարչապետ Նիկոլ Փաշինյանն է այսօր նման սպառնալից գրառումով հանդես եկել ֆեյսբուքյան իր էջում: Նա այս թեմային անդրադարձել է, ինչպես ինքն է ասում մամուլի հրապարակումների պատճառով, բայց մամուլը Արցախի հակահեղափոխական օջախ դառնալու մասին անդրադարձեր չի կատարել: Իրականությունն այն է, որ Նիկոլ Փաշինյանը շարունակում է կռիվ տալ նախկինների, նրանց ուրվականների հետ:Այսպիսով՝ Արցախում «հակահեղափոխության օջախի» թեման գեներացնող բազում իրադարձություններ են տեղի ունեցել վերջին շրջանում, որոնք էլ Նիկոլ Փաշինյանին ահաբեկել են ու նա առանց իրեն հաշիվ տալու հեղափոխություն է խոստանում պատերազմական պետությունում: Այն դեպքում, երբ քաղաքակիրթ աշխարհում հեղափոխությամբ պարծենալը նույնիսկ ամոթ է, քանզի մեր օրերում դա համարվում է վայրագության մի դրսեւորում:
<<Հակահեղափոխական>> իրադարձություններից մեկն, անշուշտ Արցախի նախկին եւ ներկա նախագահներ Բակո Սահակյանի եւ Արկադի Ղուկասյանի հայտնի նամակ-խնդրագիրն էր ՝ Ռոբերտ Քոչարյանի ազատության վերաբերյալ, այն մերժվեց, բայց ըստ երեւույթին վախերը մնացին, նամակին անմիջապես հաջորդեց Քոչարյանի հարցազրույցը Ռոյթերսին եւ հայտարարությունն այն մասին, որ իշխանության դեմ մեծ բեւեռ է գեներացվում, ինքն անկասկած միանալու է այդ բեւեռին:
Նիկոլ Փաշինյանը Ռոբերտ Քոչարյանին փակի տակ պահելով էլ փաստորեն սարսափում է նրանից ու անկեղծ հավատում, որ կարող է իր՝ ժողովդի իշխանություն ունեցող վարչապետի դեմ հակահեղափոխություն իրականացնել:
Հայաստանի եւ Արցախի իշխանությունների միջեւ լուռ հակասությունը, անջրպետը նկատելի դարձավ եռատոնի ընթացքում, երբ Վիտալի Բալասանյանը քամահրանքով ցույց տվեց Նիկոլ Փաշինյանի կողմը, ասելով, որ <<վերելակային բանակցություններ վարող վարչապետը>> կտա այն հարցի պատասխանը, թե ինչու են շատացել սահմանային միջադեպերը:
Բավականին նկատելի դերակատարում վերապահվեց Սերժ Սարգսյանին, որի մասնակցությամբ լուսանկարներ տարածեցին Արցախի ներկա ու նախկին այն պաշտոնյաները, որոնք ասոցացվում են Հայաստանի նախկին իշխող համակարգի հետ:
Սերժ Սարգսյանը նաև տվեց թավշյա հեղափոխությունից հետո իր ամենաերկար հարցազրույցը՝ դրանում իհարկե խոսում էր բացառապես արցախյան պատերազմի և Շուշիի ազատագրության պատմության մասին:
Միաժամանակ Արցախում այս օրերին Դաշնակցությունն է Հայաստանի հետ ռազմաքաղաքական դաշինք կնքելու օրակարգով ֆորում անցկացնում, այդ հավաքին ՀՅԴ-ն կոնսոլիդացրել է նախկին համակարգի ներկայացուցիչներին: Եւ ահա, այս հավաքներից ու հայտարարություններից Նիկոլ Փաշինյանի իշխանությունը սարսափել է, քանզի հասկանում են, որ էյֆորյան արդեն նահանջել է եւ մի փոքր կայծը կարող է մեծ հրդեհի պատճառ դառնալ:
Անի Սահակյան