Լոռու մարզում տրակտորը բախվել է Opel-ին և գլորվել Դեբեդ գետը. վարորդին տեղափոխել են հիվանդանոց

Ապրիլի 15-ին, խոշոր ավտովթար է տեղի ունեցել Լոռու մարզում: Ժամը 10:30-ի սահմաններում Մ-6 միջպետական ավտոճանապարհի 57-րդ կմ հատվածում Լոռու մարզի Լերմոնտովո գյուղի բնակիչ, 24-ամյա Սերգեյ Չիտովը իր վարած GFB մակնիշի 2326 SU համարանիշի տրակտորով դուրս է եկել հանդիպակաց երթևեկելի գոտի, բախվել Տավուշի մարզի Պտղավան համայնքի բնակիչ, 35-ամյա Գեորգի Արզումանովի վարած Opel մակնիշի 33 DU 360 համարանիշի ավտոմեքենային: Ինչպես հայնտում է ֆոտոլրագրող Գագիկ Շամշյանը, բախման հետևանքով տրակտորի վարորդ Ս. ՉԻտովը կորցրել է ղեկի կառավարումը և մոտ 10 մետրից գլորվելով՝ հայտնվել Դեբեդ գետում: Opel-ի վարորդ Գ. Արզումանովը օգնություն է ցուցաբերել վարորդին, օգնել դուրս գալ գետից և բարձրանալ ճանապարհահատված, որտեղից վերջինին մարմնական վնասվածքներով դեպքի վայր ժամանած շտապօգնության ավտոմեքենայով տեղափոխել են Ալավերդու բժշկական կենտրոն: Դեպքի վայր են ժամանել ճանապարհային ոստիկանության 2-րդ սպայական գումարտակի 5-րդ վաշտի 2-րդ դասակի ծառայողները՝ վաշտի հրամանատար Սմբատ Նորեկյանի, դասակի հրամանատար Արա Շահնազարյանի գլխավորությամբ: Փաստի առթիվ նույն վաշտի հետաքննիչ Գարիկ Մելիքսեթյանի կողմից նյութեր են նախապատրաստվում: Լուսանկարները՝ Էդիկ Սիմոնյանի Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: