Շմայսը՝ Նիկոլ Փաշինյանի ֆան-ակումբի անդամ

Հավանաբար անցյալ կյանքում Շմայսը՝ Առաքել Մովսիսյանը Նիկոլ Փաշինյանի մոլի ֆանատներից է եղել, եւ այդ նկրտումները ի հայտ են գալիս նաեւ հիմա: Գուցեեւ այդ ֆանատիզմն էր պատճառը, որ նախորդ գումարման Ազգային ժողովում Շմայսը որեւէ անգամ անտարբեր չէր անցնում Փաշինյանի ելույթների կողքով, չէր կարողանում շատերի պես անտեսեր ընդդիմադիր գործչի սուր քննադատություններն ու ելույթները ու երբեմն-երբեմն բռնվում էր բանավեճի, այն էլ այնքան կրքոտ ու բուռն, որ դեռ երկար կհիշվեն: Օրինակ՝ <<Արան դու ես արա, քո պապաններն են արա>>  միջադեպերից մեկի ժամանակ Փաշինյանը կերցրել էր նրան:  Հենց այդ բուռն սիրուց դրդված էր, որ քաղաքացիական անհնազադության օրերին Շմայսը կրկնեց Փաշինյանի ձեռագիրը ու նրա ոճով փակեց մայրուղի,որպեսզի թույլ չտա հարազատ Էջմիածնի ու ընդհանրապես Արմավիրի մարզի բնակչության հոսքը մայրաքաղաք Երեւան: Բայց եթե նախկինում այդ սերը քողարկված էր ու ծածուկ, ապա հիմա Շմայսը որոշել է, որ սերը գաղտնի չի պահելու ու այդ մասին խոստովանեց ի լուր աշխարհի: Ամեն ինչ սկսվեց այն բանից հետո, եր ԱԱԾ-ն երեկ խուզարկություն իրականացրեց ՀՀԿ-ական նախկին պատգամավորի առանձնատանը, խուզարկությունից հետո էլ Շմայսին տարան ԱԱԾ ու բաց թողեցին մեկ օր անց: Այն, ինչ պատահեց հետո, շատ հուզիչ էր: Դուրս գալով ԱԱԾ մեկուսարանից ՀՀԿ-ի ամենաօդիոզ դեմքերից մեկը սկսեց երգել Նիկոլ Փաշինյանի ժամանակների երգը: Մովսիսյանը փայլատակող աչքերով տեսախցիկների առջեւ իր գոհունակությունը հայտնեց ԱԱԾ-ից ու նրա  աշխատանքից։ «Ազգային անվտանգությունը ներխուժեց մեր բնակարան՝ իրենց ամեն ինչով։ Որտեղ ինչ ունեի, օրենքի տառին համապատասխան ստուգեցին։ Այնտեղ կային օրինական միավորներ՝ իմ ատրճանակները։ Մի հատ անօրինական բան չեն արել, շատ շնորհքով ներխուժել են, ոչ մի երեխա նաև չի վախեցել տանը»,- ասաց  Մովսիսյանը՝ շարունակելով. «Ես շատ շնորհակալ եմ Ազգային անվտանգությունից, նախկինում նման բան չի եղել, վայրագություններ է այն ժամանակ եղել, իմ ողորմածիկ եղբոր տանը բերին զենք գցին, թուղթ գցին»։ Իհարկե, դժվար է իջնել նրա մակարդակին ու համապատասխան տրամաբանությամբ  բացատրել, որ ներխուժումը չի կարող օրինական լինել, առավել եւս՝ շնորհքով, և, եթե նա այդքան ջանասիրաբար փորձում է պաշտպանել ԱԱԾ-ին, գոնե ավելի համարժեք բառեր պետք է ընտրեր: Բայց նրա սերն ինքնամոռաց է, նա սիրում է կուրորեն ու պատրաստ է օրերով ճամարտակել ԱԱԾ-ի օրինական գործելաոճի մասին, «Օրինական ճանապարհով ամեն ինչ ստուգել են, ամբողջ գյուղը տակնուվրա էր եղել, իմ կամքով ու օրենքով սահմանված կարգով ամեն բան հանձնել եմ ԱԱԾ-ին։ Շնորհակալ եմ նաև, որ ԱԱԾ-ն շատ պրոֆեսիոնալ արել է իր գործը և ամեն ինչ արել է օրենքի տառին համապատասխան: Ինչ որ ունեցել եմ ամբողջը հանձնել եմ օրինապահ մարմիններին` մնացածը արդեն ԱԱԾ-ի որոշելիքն է, քննություն են իրականացնում»: Ինչպես տեսնում եք՝ պետք չէ զարմանալ, մարդն անկեղծ խոստովանում է, որ ԱԱԾ-ին է հանձնել բացառապես ամեն ինչ, ինչ որ ուներ,  անգամ քիչ, թե շատ ունեցած ուղեղը ու հիմա այսպես բոբիկ էլ դեմ չէ դառնալ Նիկոլ Փաշինյանի ֆան-ակումբի անդամ: Անի Սահակյան