Մանվել Գրիգորյանի աներորդին իր տանը զինանոց ունի

Ոստիկանության աշխատակիցներն երեկ` հունիսի 19-ին, այցելել են Ավան-Առինջի թիվ 7 հասցեում, նախկին մանկապարտեզի տարածքում գործող «ԵԿՄ Ավան» տարածքային բաժանմունք։ Ոստիկանության մամուլի ծառայությունից հայտնում են, որ խուզարկության ընթացքում ԵԿՄ տարածքում հայտնաբերել են տարբեր տրամաչափի 7 փամփուշտ, ինքնաձիգի օպտիկական սարք, զինվորական կիսաթեւ 65 շապիկ, զինվորական 5 սվիտեր եւ «TAMAR MENTHOL» գրառմամբ 500 տուփ ծխախոտ։ Իսկ ԵԿՄ Ավանի տարածքային կառույցի նախագահ Պետրոս Ամիրյանի տանը` Ավան 10-րդ փողոց հասցեում, հայտնաբերվել է 9 մմ տրամաչափի «Բայկալ» տեսակի ատրճանակ՝ փամփշտատուփում 8 փամփուշտով, «Վեպր» որսորդական հրացան՝ օպտիկայով, 12 տրամաչափի «Սարսիլմազ» հրացան, 5.6 մմ տրամաչափի «ՏՕԶ 8» հրացան, «Կարաբին» 7.62 մմ տրամաչափի հրացան, հրացանի 3 խզակոթ, 1 հատ թուր՝ ընդհանուր 72 սմ երկարության, շեղբը 52 սմ երկարության եւ 3.7 սմ լայնության, 1 հատ սվին դանակ, օդաճնշիչ 3 հրացան, 5.6 մմ տրամաչափի 612 փամփուշտ, 7.62 մմ տրամաչափի 20 փամփուշտ՝ 2 պահունակով, որսորդական տարբեր տրամաչափի 105 փամփուշտ, 1 պահունակ 8 հատ 9 մմ տրամաչափի փամփուշտներով, սպայական 29 վերնաշապիկ, զինվորական 14 սվիտեր եւ ական որոնող 1 սարք: Ոստիկանությունը հայտնում է նաեւ, որ հայտնաբերվածն առգրավվել է: Կատարվում է քննություն: Նշենք, որ Պետրոս Ամիրյանը ԵԿՄ վարչության նախագահ Մանվել Գրիգորյանի աներորդին է՝ նրա կնոջ` Նազիկ Ամիրյանի եղբայրը: