Մոսկվայից Ստեփանակերտ. ի՞նչ ուղերձ էր բերել Փաշինյանը Բակո Սահակյանին
Նիկոլ Փաշինյանը Մոսկվայից վերադառնալուց հետո անմիջապես մեկնեց Արցախ: Արցախի Հանրապետության նախագահ Բակո Սահակյանի հետ այցելել է Արցախի արևելյան հատվածի պաշտպանական դիրքեր: Փաշինյանին և Սահակյանին ուղեկցել են Հայաստանի և Արցախի պաշտպանության նախարարներ Դավիթ Տոնոյանն ու Լևոն Մնացականյանը, ինչպես նաև ՀՀ զինված ուժերի գլխավոր շտաբի պետ Արտակ Դավթյանը, գլխավոր ռազմական տեսուչ Մովսես Հակոբյանը: «Հայկական երկու հանրապետությունների ղեկավարներին ներկայացվել են ինժեներական և ամրաշինական ենթակառուցվածքներն ու հուսալի պաշտպանություն իրականացնելու նոր տեխնոլոգիաները», ասվում էր հաղորդագրությունում: Նիկոլ Փաշինյանի այցի հիմնական ուղերձն այն էր, որ նա սատարում է Բակո Սահակյանի իշխանությանը: Սա կարևոր մեսիջ է Ստեփանակերտում վերջերս բողոքի ակցիաների ու Արցախի նախագահի հրաժարականը պահանջելու կոչերի ֆոնին: Այսպիսով, Փաշինյանն այս փուլում կարևորում է, որ Արցախում շրջադարձային փոփոխություններ չպետք է լինեն, և որ Արցախում կայունությունն այս վիճակում ամենից կարևոր է: Ստեփանակերտ՝ Փաշինյանի այցի հաջորդ մեսիջը Մոսկվայից Արցախ՝ կարող է կապված լինել իհարկե ղարաբաղյան կարգավորման գործընթացի հետ: Մոսկվայի դիրքորոշումն այս պահին ԼՂ հարցում խիստ կարևոր է, ավելի ճիշտ ստատուս-քվոն պահպանելու և ռազմական գործողությունների վերսկսման տեսանկյունից: Գոնե հրապարակային մոսկովյան այցերի ժամանակ ԼՂ խնդրի խաղաղ կարգավորման, ավելին՝ սահմանային լարվածության վիճակի մասին հայտարարություններ չեն արվել, իսկ սա հայկական կողմի համար մեղմ ասած՝ վտանգավոր է: Նշանակում է ցանկացած պահի Բաքուն կարող է լարել իրավիճակը՝ իմանալով, որ Մոսկվայից հակահարված չի ստանալու, ճիշտ այնպես, ինչպես եղավ 2016-ի ապրիլյան պատերազմի ժամանակ, երբ առաջին 2 օրերին Մոսկվան լուռ էր, իսկ երբ հայկական կողմն անցավ պատժիչ գործողությունների՝ Բաքուն Մոսկվայով զինադադար էր արդեն աղերսում: Ի դեպ, նկատենք, որ Փաշինյանի մոսկովյան այցի օրերին Ռուսաստանի արտաքին գործերի նախարարության մամլո քարտուղար Մարիա Զախարովան նշեց. «Իհարկե, բարենպաստ մթնոլորտի ստեղծումը միայն նպաստում է բանակցային գործընթացի առաջխաղացմանը և ոչ միայն նպաստում է, այլև պարզապես կարևորագույն երաշխիք է այս խնդրի լուծման համար»: Անդրադառնալով արցախյան հակամարտության կարգավորմանը՝ Զախարովան ասել է, որ «Մոսկվան առավելագույն կերպով անում է ամեն բան, որպեսզի Լեռնային Ղարաբաղի խնդիրը կարգավորվի»: «Ինչու՞: Դուք դա հիանալի գիտեք: Նախ, մենք ցանկանում ենք, որպեսզի երկու ժողովուրդները, ի վերջո, կարգավորեն այդ արյունալի խնդիրը, երկրորդ, որովհետև մենք ցանկանում ենք զարգացնել Հայաստանի հարաբերություններն Ադրբեջանի հետ, և որպեսզի Հայաստանն ու Ադրբեջանը զարգացնեն իրենց հարաբերությունները: Ինձ թվում է, որ մեր և Ձեր խնդիրն է մոտեցնել կարգավորման պահը, ոչ թե հեռացնել այն»,- ասել է Զախարովան: Մոսկվայի հաշտեցման մեսիջներն, ինչ խոսք, այս փուլում, երբ Ադրբեջանը կուտակումներ է անում սահմանին՝ բավական հետաքրքրական է: Թամար Բագրատունի
Հետևեք մեզ Viber-ում
