Զենքն անօրինական չէ, բայց պայքարն իրական է. hraparak.am

Այսօր ոստիկանությունը հաղորդագրություն է տարածել․ «ՀՀ ոստիկանության կազմակերպված հանցավորության դեմ պայքարի գլխավոր վարչությունում տեղեկություններ են ստացվել, որ նախկին բարձրաստիճան պաշտոնյա Հովհաննես Հովսեփյանը երթևեկում է թիկնազորով և մեքենաներում զենք-զինամթերք կա։ Հունիսի 18-ի գիշերը՝ ժամը 23-ն անց 40-ի սահմաններում, ոստիկանները Կիևյան և Օրբելի փողոցների խաչմերուկում հատուկ գործողություն են իրականացրել։ Մեքենաներում հայտնաբերվել են ինքնաձիգ և ատրճանակ, որոնց օրինականությունը ստուգվում է։ Մեքենաները տեղափոխել են ճանապարհային ոստիկանության պահպանվող հատուկ տարածք։ Դրանցից երկուսը եղել են փոխարինված համարանիշերով, ինչպես և մեքենաներում տեղադրված են եղել հատուկ ձայնային ազդանշաններ արձակելու սարքավորումներ, առկայծող փարոսիկներ, նաև ռադիոկապի միջոցներ։ Իրավախախտումների փաստերով կազմվել են արձանագրություններ։ Հանգամանքները պարզվում են»։ hraparak.am-ը տեղեկացել է, որ չնայած ոստիկանությունն արդեն պարզել է, որ հայտնաբերված զենքն օրինական է՝ մեկը Հովհաննես Հովսեփյանին պատկանող անվանական զենքն է, մյուս՝ ոստիկանին ամրագրված զենքը, սակայն այնուամենայնիվ հայտարարությունը տարածվել է։ Ըստ լավատեղյակների, այժմ թեժ պայքար է գնում Վալերի Օսիպյանի եւ Արթուր Վանեցյանի միջեւ, թե՝ ով ավելի շատ կբռնի, ով ավելի աղմկահարույց բացահայտումներ կանի, ում բռնածն ավելի հնչեղ անուն կլինի։ Նրանք Նիկոլ Փաշինյանի չբարձրաձայնած հրահանգը ճիշտ են ընկալել եւ որոշել են կոռուպցիայի ու նախկին իշխանությունների դեմ պայքարի հերոսները դառնալ՝ արդարացնելով իրենց նշանակողի հույսերը եւ փարատելով իրենց նշանակման հետ կապված բոլոր կասկածները։