«Շտապ օգնության մեքենան ասեղ չի, որ տանես, մի տեղ պահես.պետք է պատասխանատվություն կրեն». Էդմոն Մարուքյան

  ԱԺ ճեպազրույցների ժամանակ  «Ելք» խմբակցության ղեկավար Էդմոն Մարուքյանը` անդրադառնալով Մանվել Գրիգորյանի ձերբակալությանը ,հայտարարեց.«Բոլորս ցնցված ենք և շոկի մեջ ենք: Կոռուպցիայի և բանակը թալանելու մասին շատ է խոսվել, բայց այս դեպքը, կարծում եմ, տարբերվում է, որովհետև սա կոնկրետ պատերազմական գործողությունների արդյունք դրամահավաքի և անգամ դպրոցներից կազմակերպված աջակցության թալան է, որը մենք ամենախիստ կերպով դատապարտում ենք:Ապրիլյան պատերազմի օրերին Հայաստանում եղել է ոստիկանություն, ԱԱԾ, Պաշտպանության նախարարություն, մարմիններ, որոնք համակարգել են և՛ օգնություն ստանալը, և՛ այն ուղղորդելը, և՛ բաշխելը, հետևաբար` միայն պարոն Գրիգորյանը չէ, որ պետք է պատասխան տա այս ամենի համար»: « Արմավիրում կան իրավապահ մարմիններ, որոնք կարող էին իմանալ այս ամենի մասին: Շտապ օգնության մեքենան ասեղ չի, որ տանես, մի տեղ պահես: Ես կարծում եմ` նաև իմացող-թաքցնողները պետք է պատասխանատվություն կրեն»: Քաղաքական առումով ՀՀԿ խմբակցությունը պետք է քաղաքական գնահատական տա և աջակցի իրավապահ մարմիններին, որևէ խաթարող միջամտություն չպետք է լինի դրա հետ կապված:Ակնհայտ է, որ կասկածները եղել են նախկին իշխանությունների օրոք, և պետք է պատասխան տան` ստուգել են, չեն հայտնաբերե՞լ, թե՞ անգործության են մատնված եղել,ասաց Մարուքյանը: Նրա խոսքով` որևէ մեկի ամառանոցում, թույլտվություն ստանալ և խուզարկություն իրականացնել՝ դժվար բան չի եղել, խնդիրը քաղաքական կամքն է, իրավապահների գործողությունները քաղաքական մակարդակով կանգնեցվե՞լ են, թե՞ ոչ: «Այդտեղ բաներ կան, որ մի մարդու գիտենալով չի,- ասաց Է.Մարուքյանը` նկատելով, որ պարոն Գրիգորյանը չէր կարող միայնակ այդ մեքենաները, արկղերը տանել, վերաբաշխել,- Չպետք է նա միակ մեղավորը լինի, պետք է նաև այլ պատասխանատուներ լինեն»: Է.Մարուքյանի կարծիքով` քաղաքական իշխանություններն արդեն կրում են պատասխանատվություն այս տեղեկատվության տարածման պահից. «Սա ծանրագույն հարված է ՀՀԿ-ին»: